Aashakati oya hala opate okuya komayendo gaMuni mOshakati
Aakalimo yomomudhingoloko gwaShakati shokuuninginino, otaya indile elelo lyondoolopa yaShakati lyi ya tulile ko oteya kokapate hoka ku uka komayendo gamuni.
Okapate hoka ka pita momukunda Othingo, oke li okilomita yimwe okuza mOshakati.
Aakalimo yomOshakati mboka haya ka fumbika aapambele yawo komawendo gamuni, otaya nyenyeta kutya okapate hoka otaka teyagula po iihauto yawo.
Taya ti, nonando opate ndjoka ohayi sikalapwa konima yethimbo nethimbo, natango ohayi kala yi na omalambo oshowo omamanya ga nika oshiponga, ko okawineyi oku enda iihauto ya humbata omidhimba, ishewe omalambo ngoka otaga yonagula po iiyenditho yawo.
Sheendeni Nuuyoma omukalimo gwomOshakati okwa ti, Othingo omukunda gu li popepi nondoolopa, sho osho shoka ya tula ko omawendo.
“Oshike tashi nyenge elelo lyondoolopa lyi tule ko opate yoteya, ngele kehe thimbo mooradio otaku popiwa ehumokomeho,” ta pula ngaaka.
Nuuyoma ta ti, oya ningi ethimbo taya nyenyeta opate ndjoka ihe, kape na ngoka he ya pe etompelo ngele ope na kutya oshike itaaku tulwa oteya, yo opate ohayi longithwa.
Omukulukadhi gwomimvo dhi li pokati gwomomukunda Othingo, ngoka edhina lye lyi shiwike kuKundana okwa ti, oya hala opate yoteya. Ta ti, nonando oyu uvite kutya anuwa methimbo efupi anuwa Othingo otayi ka ninga ondoolopa, iihauto yawo otayi sasuka po kokapate hoka. “Okapate haka ohandi ka ende esiku kehe ndu uka kiilonga, ihe kake li monkalo ombwaanawa noku endwa koohauto oonshona ngaashi dhetu,” ta ti ngaaka.
Ta gwedha po ta ti, shapo ongele ta hingi kashona lela, ihe ito ka thika pethimbo. Ta popi ta ti, ngele itaya vulu okutula ko oteya, elelo lyondoolopa nali longe nawa opate, yi kale ya elekana yo kaayi na omalambo, oshoka otayi teya po iihauto. “Oondjila oshinima sha simana, onkene odhi na okukala tadhi silwa oshimpwiyu okuyanda iiponga oshowo omawupyakadhi galwe,” a popi ngaaka.
Omupopiliko gwelelo lyondoolopa yaShakati Katarina Kamari okwa ti, kehe omumvo metengenekothaneko lyokomumvo, ohaya thaneke mo oopate tadhi tulwa oteya momudhingoloko gwaShakati.
Kamari ta ti, otaya tameke manga noondjila ndhoka hadhi longithwa unene. Opate yokOthingo nayo otayi ka tulwa opate yoteya, uuna ya mana okutula oondjila ndhoka hadhi longithwa ethimbo alihe koshigwana. vkaapanda@nepc.com.na