Okanona (7) ka dhipaga kakwawo nokuholeka omudhimba
Okanona kokamati komimvo heyali otaka falwa kehungomwenyo sho anuwa ka dhipaga okanona komimvo mbali pamukalo gwoku ka hwela omavi mokana nomomeho nokonima oka holeke omudhimba.
Sha ikolela komukuluntu gwopolosi moshitopolwa shaShikoto Teopoline Kalomo Nashikaku, oshiningwanima shoka osha holoka molyOmakaya lwopotundi 20h00 momukunda Ohainkete momudhingoloko Nehale Lyampingana.
Otaku hokololwa kutya okanona hoka kokamati ohaka zi puushinda ihe inaya pambathana nanakusa.
Nashikaku okwa hokolola kutya okanona hoka kokamati okali ka thigwa megumbo nokanona hoka omanga aakuluntu yali ya za mo megumbo.
Ta ti okali anuwa ka tula okanona hoka omavi momeho oshowo mokana sigo ka si.
Sho anuwa ka dhimbulula kutya okanona itaka inyenge we, okamatyona hoka anuwa okwali ka hilile olutu lokanona hoka mondunda yimwe yomwiidhi noku lu siikila nekumbatha, etaka mwena.
Konima, kamatyona ngonga anuwa okwa matulile kuyakwawo mboka yali yaka tyaya iikuni noku ya lombwela shoka a ningi.
Ta ti ya kwawo okwali ya ka tala shoka tashi popiwa no yali ya matulile kookamba yaka lopotela aakuluntu.
Nashikaku ta hokolola kutya aakuluntu okwali ya lopotele opolisi meendelelo.
Nakusa okwa tseyika nedhina Ndeshipanda Naameondeni
Opolisi oya ndhindhilike iiningwanima yi nyanyaleka tayi ningwa kaanona aashona, unene iiponga yoludhi ngaandi ka. Aanona oyendji oya si ya dhipagwa kuunona uukwawo nenge wa mono iiponga omanga wuli metonatelo lyaanona yakwawao.
Opolisi oya ti, oya kala noku lopotelwa iiningwanima yi nyanyaleka tayi ningwa kaanona yeli kohi yomimvo omishona mboka ya ndhipaga mokwaaha shiisha no itaya vulu okupewa egeelo.
Oshiwike sha zi ko, okanona komimvo mbali, Selma Namvula Iifo kokomukunda Oshilulu moshitopolwa shaMusati, oka si sho kali kadhengwa niimwati kuunona uumayinagona wuumati womimvo 11 no12. Aanona mbaka anuwa oyali ya thigwa megumbo nokandenge hoka ya pilukile po noku ka dhenga niiti yomusati, noku ka thanga.
Oka li ka hulitha pethimbo ndjoka lyomahepeko.
Opolisi oya gandja wo oshiholelwa shaanona taya kwatathana koonkondo momagumbo oshoka ka mu na etonatelo lyaakuluntu ya gwana .
Aakuluntu inaya manguluka we okuthigaaanonayawomomagumbo oshokaotayalongelwaiiningwanima inayi uta.
Opolisi oya kumagidha aakuluntu ya putudhe aanona yawo nombepo ombwaanawa okuyanda iiningwanima yatya ngaaka.
Tayi ti, okanona kaputudhwa nawa, itaka longo iilonga yolundhi ndoka oshoka otaka vulu oku yoolola shoka shili mondjila naashoka sha puka.