Omunasikola moNigeria a gandja ombili komunyekadhi gwaBuhari
Omunasikola koshiputudhilo shopombanda moNigeria ngoka a li a mangwa po noku panga iiwike iyali mondholongo sho anuwa a tukagula omukulukadhi gwomupresidente gwoshilongo Muhammadu Buhari, osho a gwaya evi.
Aminu Adamu Mohammed okwa mangululwa Etitano lya zi ko sho anuwa ali a silwa ohenda.
Pethimbo a li a holoka mompangulilo Mohammed okwa li a patana kutya okwa taandelitha uuyelele gwomutoto.
Okwali a patana kutya okwa tukagula noku nyana Aisha Buhari kutya okwa longitha nayi iimaliwa yoshigwana sho e yi longitha moompumbwe dhe mwene.
Ashike miinyolwa oyindji ye yokoTwitter omunamimvo 24 nguka okwa gandja ombili komunyekadhi gwaBuhari.
“Ka kwali ndi na elalakano lyoku ku uvitha nayi,” ta ti ye ta uvaneke kutya ota lundulula onkalo ye.
Ta ti oshinima shoka a yi musho osha li onkalo yomilema kaaku na we monkalamwenyo ye ayihe.
Ina gandja uuyelele muule, ashike okwa gandja olupandu olunene kwaamboka yali ye mu yambindhidha, ta ti oshinima shika oshe mu longo oshilongwa oshinene.
Ashike okugandja ombili kwe okwa eta omaipulo kosocial media hoka Aanigeria oyendji mboka taya ti meme Buhari oye a li ena oku gandja ombili omolwa omukalo ngoka a ihumbatele nawo omumati nguka.
Ashike yamwe otaya ti okwa ninga nawa sho a gandja ombili oshoka okwa kandula po oontamanana.
Ekwato po lyomunasikola nguka olya li lya eta ongeyo onene kosocial media hoka oyendji yali taya pula opo a mangululwe moompadhi oontalala.
MEtine lyoshiwike shazi ko ehangano lyuuthemba gwomuntu lyoAmnesty International olya ti Mohammed okwali a lulumikwa kolutu, nokwali wo a ningilwa omahepeko galwe.
Olya li lya pula opo uutendo tawu popile omahepeko moNigeria wu talululwe. Epangelo kalya li lya tya ko sha komappyo ngoka.
Mohammed oku li omunasikola ti ilongele ekaleko po lyomindhingonoko koshiputundilo shopombanda shedhina Federal University shi li moDutse, moshitopolwa shaJigawa, okwa mana ekonaakono mOmaandaha goshiwike shika.