Sikwata sa babiteleli silengiwa lilimo zelobapeli

Sikwata sa mitangana bane bafumanwi mulatu wakuswala ni kubitelela kalibe mwatolopo ya Tsumeb hane basali bashimani, nebalengilwe lilimo zelobapeli zakuina mwasitokisi. Khuta Yepahami ya Oshakati nelengile Immanuel Kariseb (30), Marks Beukes (30) ni Nelson Xamiseb (30) lilimo zelobapeli muñwi ni muñwi, kamulatu wakuswala ni milatu yemilalu yabubiteleli. Khuta nebalengile lilimo zene kamulatu wabubiteleli, ni lilimo zelishumi kamulatu wapili wabubiteleli, mi zesilezi neli beezwi kwatuko kalilimo zeketalizoho, kataelo yakuli habaezi kezo yeswana mwanako yeo.

Khuta hape nebalengile lilimo zelobapeli hala milatu yemibeli yabubiteleli, mi likatulo zeo lika yelela ni likatulo zapili zepeli. Muatuli Herman January naize hanafa katulo natalimile taba yakuli babanyazwa sebainzi lilimo zelishumi mwatolongo balibelezi kuzekiswa, mi kaufela nebana ni lilimo zelishumi kazesupile kanako yakueza kezo. “Babanyazwa, nihane bali banana, neba ezize inge libangoki zezibahala, nebamusweli nikumuhohololela kwasibaka kone bailo cincana kumubitelela. Zeo neli ezahezi nihane bahaniswa kiyomuñwi yomuhulu yene bazamaya niyena, hamoho cwalo ni mubilaeli yane abakupa kuli bamusiye,” nekubulezi muatuli.

January naize sikwata hasikoni kuipata fabwanana, mi hape nebasika bonisa kuinyaza. Muatuli nabafumani mulatu mwakweli ya Muimunene kakuswala musizana nikumuhohela mwamacacani mone bailo cincana kumubitelela. Bupaki bone bufilwe kanako yamuzeko bubonisa kuli babanyazwa nebaile kwakunwa, pili basika peta kale kezo yeo hane bali kwamukiti walinyalo. Mubilaeli nalibile kwandu haswaliwa. Kezo nebile teñi la 5 Ñulule 2009, mabapa ni sikolo la Otjikoto mwa Tsumeb.