Panka ya DBN iyaha makilasi mwa Zambezi

Sicaba sa Maunga mwasilalanda sa Chinchimane nesi tezi tabo Labubeli, kasamulaho panka ya Development Bank of Namibia (DBN), netambekile makilasi amabeli ane ayahilwe kaneulo ya panka.

Makilasi nayahilwe kikampani ya ZAPP Trading Solution kasinyehelo yelikana N$500 000, kutusa sikolo sa matakanyani sesina nibaituti bamashumi alobañwi kababane, teñi baituti nebalutelwa mwamakilasi amubu kapa mwamatente.

Hana bulela kanako yakutambeka makilasi Yomuhulu wasikolo sa Maunga, Susan Museke nafitisize nyakalalo kuli makilasi afelile kuyahiwa, mi naize akatusa hahulu baituti.

“Makilasi akambweshafaza palo yabaituti, hakubapanwa ni makilasi amubu ane basebelisa. Akatusa hape maticele kueza hande, nikuba nikabelo mwakunanula mayemo atuto mwasikiliti ni naha kabupala,” nekubulezi Museke.

Muyemeli wapanka ya DBN Jerome Mutumba natambekile makilasi kwakamaiso yasikolo, mi naize aka imulula baituti.

“Hane lufumani kupo yeswanasina ye, neluna nikufumana nzila yakutusa sicaba. Kipuluko mwasicaba sa Maunga kwabukamuso bwa baituti, tuto kiya butokwa,” nabulezi. Nakupile maticele ni baituti kubabalela muyaho kuli lilimo zelishumi zetaha usakona kuba mwamayemo sakata.

Mutatubi walikolo wasilalanda sa Chinchimane Rosco Lukubwe naize neilo kiya butokwa sina “liluko halisakoni kuabela kwatokwahalo yalisebeliso kwabaituti kaufela mwanaha.”

Sicaba nesi itumezi kwaneulo, kono nesikupile kuli makilasi ni mandu amaticele abeelwe mulilo wamagesi. Nesikupile hape kuli kubeiwe lisebelezo zalimbuzi sina sikolo hasi sina.

Nebakupile hape liluko la tuto kuekeza litopa kuisa sitopa sa busupa, sina baituti habana nikuzamaya libima zesupile kuya kwasikolo sesili bukaufi sesina ni litopa zakwatasi zepahami.