Olukongo lwaaiyaki mondholongo yaMexico lwa eta etiko lyombinzi
Aantu ya thika puyaheyali oya dhipagwa momaumbathano moMexico sho aanambelewa taya kongo aanandholongo 30 mboka ya li ya iyaka mondholongo mOsoondaha. Aalumentu ya homata oondjembo oya li ya patulula omundilo ya ukitha maakonaakoni yepangelo mboka ya li taya kongo aanandholongo, noya dhipaga yaali. Yatano yomaalumentu ya homata oondjembo oya li wo ya dhipagwa, ashike inashi yela mo nawa natango ngele yamwe yomwamboka ya iyaka mondholongo opwa dhipagwa gumwe. Ongenga yedhina Los Mexicles, ndjoka yi na ekwatathano nongenga yoSinalao, otaku dhiladhilwa oyo ya longa oshikulumuna shika. Eiyako mondholongo lyomOsoondaha mo Ciudad Juarez olya li olyo lyimwe lya tika ombinzi moomvula dhongashiingeyi, ya thigi aatonateli 10 naanandholongo yaheyali ya sa. Iilyo yoLos Mexicles otaku fekelwa ya kutha onkatu konima sho ondholongo ya li ya udha kaatalelipo mboka ya li taya halele aaholike yawo ompolo yomvula ompe.
Sha ikwatelela kiikundaneki yomoshilongo oya li ye ya niihauto ya yooloka noya umbu oondjembo ya ukitha maatonateli mboka ya li posheelo. Aanandholongo oya li ya teme omatalashe gawo opo ya ngangwanithe aatonateli yondholongo.
Petameko, aanambelewa oya ti aanandholongo 12 oya li ya tauka mo, ashike omukuluntu gwoondholongo moshilongo okwa ka tseyitha kutya aanandholongo ya adha po30 oya fhadhuka po.
Yomwaamboka ya tauka omwa kwatelwa omuleli gwoLos Mexicles, Ernesto Piñón de la Cruz, a tseyika nawa nedhina El Neto. El Neto, 33, okwa kala mondholongo uule woomvula 14, a pewa egeelo miipotha yekwatopombambyona nedhipago. El Neto okwa li a tameke iilonga yuungangala onga okanona okashona, ha kwata po aantu ombambyona ye ta futwa. Mondholongo oku li muuhona, e na iinima oyindji kaayi li kuyakwawo. Mondholongo, mokandunda ke omwa adhika oTV osho wo iimaliwa oyindji noonkondo.