“Ohandi lalakanene okulwifa ondjala noluhepo”
OMUNYASHA e na oMaster Degree ashike ina mona oilonga a tota po ofaalama yaye yoingulu Festus Hamalwa
Omukainhu weedula 27 okwa ti ota lalakanene okushakeneka epangelo ondjilakati noshoyo okulwifa ondjala noluhepo tashi pitile mokuetapo oilonga yaye mwene.
Hilya Amvula omukalimo womomukunda Omaku moshitukulwa shaMusati okwa tota po ofaalama yoingulu yaye mwene opo a dule okukala e na engeshefa yoingulu.
Pefimbo Kundana a talela po ofaalama yaye yoingulu Etitano Amvula okwa hokolola ta ti konima eshi a mana elihongo laye koshipupudilo Unam ina mona oilonga onghee okudja opo okwa twikila fiyo ta mono onghatu yoMaster Degree younamapya noimuna.
“Konima eshi nda mona oMaster Degree yange natango ina ndi mona oilonga onghee onda kendabala opo ndi kale nda tota po ofaalama yoingulu yedina NaNi Agri producer komukunda Omaku opo ndi kale handi landifa oingulu kovanangeshefa noshoyo kovakwashiwana ava ve na oivilo va pumbwa ombelela yoingulu,” Amvula ta ti.
Okwa ti momundo 2019, okwa tameka noingulu 17 fiyo omwaalu woingulu tau ende wau ka 36 ashike okwa kala a teelela omashongo oshimaliwa shokulanda oikulya yoingulu.
“Onda kala nokumona omakwafo kumumwamememati Steven Silavinus ou a kala nokuyambidida noshimaliwa shokulanda oikulya yoingulu noshoyo okutwa nge omukumo opo ndi longe nondjungu onghee ita ndi teka omukumo,” ta hokolola.
Okwa yelifa ta ti okwa kala alushe ta tuwa omukumo eshi a kala nokumona ovanyasha vakwao va dja koipupudilo ya yooloka navo ina va mona oilonga ashike ova tota po eepoloyeka davo ngaashi oikunino younamapya noshoyo okutekula eexuxwa.
“Ohandi lalakanene okukala ndina oingulu 100 mofaalama yange opo ndi dule okukala da yandja oilonga kovanyasha vakwetu,” ta ti.
Amvula okwa weda po ta ti oha yandje yoo nomadeulo kovanhu ve na ohokwe yokutekula oingulu moitukulwa ya yooloka eshi paife a yandja omadeulo kovanhu 100.
Okwa hokolola ta ti oha landifa oingulu kovanangeshefa ve na eefitola modoolopa yaKahao onghee eshi hashi mu pe omukumo wokulonga nelitulemo shaashi oha mono ovalandi vahapu keshe koshivike.
“Moshivike ohandi landifa oingulu itano. Ovanangeshefa va yooloka ohava va dengele nge ongodi tava pula okulanda oingulu ashike kandina sha oingulu ya wana nokulandifa shaashi ofaalama yange ina i kula natango,” Amvula ta hokolola.
Momudo 2021, Amvula okwa shangela omukunda kehangano loDemarine ta pula a yambididwe noshimaliwa opo a dule okuhambula opo opoloyeka yaye yoingulu.
“Momundo 2022 onda pewa N$40 000 kehangano loDebamarine opo ndi dule okukala nda hambula opo opoloyeka onghee paife onde li pyakidila nokuhambula opoloyeka yange yoo i kale pamufka wopombada noshoyo okukala handi dulu okukala ndina oingulu ihapu okulandifa,” ta ti. – fhamalwa@nepc.com.na