Kansela kOkongo ota yambidida ovanafikola ve li momhumbwe

Kansela woshikandjihoololo shaKongo Efraim Shipindo okwa tota po oshikonga shokuyambidida ovanafikola ve li momhumbwe yoikwafifo yoifokola noshoyo omidjalo dofikola.

Shipindo okwa ti ombelewa yaye otai lalakanene okushakeneka oshikondo shehongo ondjilakati tashi pitile mokuyambidida ovanafikola ve li moluhepo.

Fiyo opapa ombelewa yaKansela waKongo oya landela ovanafikola oikwafifo yofikola ngaashi omambo, eepena noshoyo eenghaku nosho tuu.

“Ina ndi hala moshikandjohoololo shange mu kale mu na okaana ita i kofikola shaashi kehe na oikwafifo yofikola,” Shipindo ta ti.

Okwa yelifa ta ti unene tuu ounona veefiye nounona ovo ve na ovadali vavo iha va longo ovo unene tava ka ta li ko tete okukala va yambidindwa kombelewa yaye shaashi okwa didilikwa moshikandjohoololo shaye mu na ounona vahapu tava dengwa koluhepo ngeenge tashi ya poikwafifo yofikola.

“Ohandi ka enda handi talele po eefikola noshoyo omikunda da yooloka opo ndi kale ta didilika kombinga younona va pumbwa oikwafifo yehongo,’” ta ti.

Okwa weda po ta ti ovadali nava kale tava kwatafana nombelewa yaye opo va yandje omadina ounona vavo ve li momhumbwe yoikwafifo. “Ehongo ola fimana kokaana okaNamibia keshe nghee itashi ulike efano liwa ngeenge tuna ounona ihava i kofikola.

Okaana ngeenge iha kai kofikola ota ka kwatwa komhepo yokulonga oimbuluma,” Shipindo ta ti.

Okwa weda po ta ti ngeenge okaana ke na oikwafifo eshi otashi tu okaana omukumo opo ka kale ta ke li hongo nondjungu.

Kansela otai indile omahangano a yooloka, ovanangeshefa, ovaleli vopapolitika opo e uye okuyambidida ombelewa yaye noikwafifo yofikola, yo i dule okupewa ovanafikola ve li momhumbwe.

Okwa ti kushe ou e na e halo na kale a kwatafana nombelewa yaye ile nombelewa yangoloneya mEenhana.