Inakulu yokaana ka fya konima yekwatonghonga e lipa ombedi
Festus Hamalwa
Omukainhu weedula 55 okwa ti ote livele ombedi eshi vati a tuma ounona va ka teke omeva keumbo lomukulupe (88) oo a li omusamane waye.
Otaku hokololwa omukulupe ou wondohotola yopamufyuululwakalo Willem Gustav, vati a kufa okaana puvakwao noku ke ka patela monduda yaye yokunangala, omo e ke ka kwatela keenghono.
Pefimbo loshiningwanima, inakulu yokaana Teopolina Amakali (55) naGustav inava hangwa ve li pamwe. Ava aveshe ovakalimo vomomukunda Okahanya moshitukulwa shaShikoto.
“Willem [Gustav] okwa li omulumenhu wange ashike onda hengana. Onda dile ko keumbo laye omudo wa dja ko muKotoba, ashike paife okwa li a fa ta eta ombili opo ndi shune kohombo,” ta hokolola.
Okwa yelifa ta ti omutamanekwa okwa kala he mu pula opo va kale tava teke omeva keumbo laye shaashi vati okwa li a hala ve lishunine. Ta ti okwa li nale hava teke poshikweyo shimwe shopomukunda, ashike eshi Gustav e mu lombwela va kale hava ka teka kopomba keumbo laye okwe shi tambula ko.
Amakali, okwa hokolola noluhodi ta ti ngeno ka li a itavele okukala tava teke keumbo laGustav ngeno pamwe okatekulu oke na omwenyo.
“Ngeno omutekulu wange ina fya, yee ngeno ina kwatwa onghonga. Ihandi kofa vali nawa, alushe ohandi lipula omutekulu wange ou a xulifila momake ange,” ta hokolola.
Pahokololo lopolifi okaana Fiina Nangwena komido nhatu oka li ka ka teka omeva nounona vakwao mooGustav eshi omukulupe ou e ka ifana konduda yaye yokunangala noku ka longela oilonga ihe fi okupopiwa.
Ounona vakwao vati ove ka uda taka kwena monduda yomukulupe, naashi va hondamena mo ove mu mona eshi e ka mbatekenena po.
Amakali ta ti ye okwa lombwelwa lwopotundi 18h00 koutekulu kutya Fiina ke udite nawa.
Ova ninga onghendabala ve mu talwe kokapangelo pomukunda wavo ashike oka hangika ka pata nale.
Onghee okudja opo okwa ninga onghendabala ka tumbwe nomeva mapyu.
“Oufiku aushe onda tokelwa ndi li omutumba shaashi okaana kakwa li ke udite nawa.
Eshi kwa sha otwa pita twa yuka kokapangelo, ashike okaana oka xulifila mondjila,” Amakali ta hokolola.
Willem Gustav okwa holoka momhangu oshivike sha dja ko nokwa anyenwa e lifutile mo modolongo. Ota tamanekelwa oshibofa shekwatonghonga noshedipao.
Oshibofa shaye osha undulilwa komafiku 03 Apiilili 2023.
Vati Gustav okwa shivika nawa pomikunda davo onga ondudu hai pange omaudu a yooloka.
Ovana vaGustav, Festus Gustav naShevanyenga Gustav ova amena xe tava ti ota lundilwa notava pula omhangu opo i mu mangulule.
“Tate okwa hangika a ya kOndangwa pefimbo okaana oko ka kwatwa onghonga.
Otava lundile tate,” Shevenyenga ta ti.
Ina yokaana Fiina, Selma Nambaxu weedula 28 okwa ti okwa dengwa pomutima kefyo lokaana kaye oko ka li oko akeke.