Okanona komumvo gumwe ka sile mondhikwa yayina

Victoria Kaapanda

Opolisi moshitopolwa shaMusati otayi konaakona oshipotha shokanona komvula yimwe hoka ka sile mondhikwa yayina mehuliloshiwike.

Omupehakuluntu gopolisi moshitopolwa shaMusati Moses Simaho okwa ti, oshiningwanima osha holoka Olyomakaya momukunda Olupandu moshikandjohogololo shaEtayi.

Otaku hokololwa kutya yina yokanona okwa li a pe okanona otyepisa ya kangwa yimwe, omanga ke li mondhikwa.

Konima yokathimbo, anuwa okanona hoka okwa li ka tameke okukolola.

Okanona anuwa oka li ka tsikile okukolola sigo ka mwena.

Anuwa okwali a mono okanona itaaka inyenge we sho ke li mondhikwa, noku ka kutha mo.

Otaku hokololwa kutya okanona kakwa li taka inyenge sho te ka ithana, shoka shali she mu halutha ee ta tondokele mbala kokapangelo ke li popepi.

Sho anuwa a li a thiki pokapangelo Olupandu, okwa li a tseyithilwa kutya okanona oka hulitha.

Moshiningwanima inaashi faathana okanona komimvo ndatu oka si eso lyi nyanyaleka sho ka pile mombashu mehuliloshiwike.

Sha ikolelela koshifokundaneki shoNew Era okanona hoka anuwa okwa li taka dhana nokapalwa pethimbo yina kwa li a lala ta vululukwa sho a zimbuka okuza kiilonga.

Otaku hokololwa kutya omulilo okwa li gwa monika kokamwayina okakulunutu hoka kwa li pethimbo ndyoka taka galuka okuza kokuteka omeya.

Sho anuwa a thiki pegumbo, omulilo okwa li gwa yaka nale, nayina yokanona okwa li azimo ta tondoka a thigimo okanona mombashu, oshoka anuwa okw angwagwana komulilo.

Omulilo okwa li gwa fike iilongithomwa yaanasikola kwa li opo ya landwa, ombete oshowo iikwawo oyindji yomegumbo.

Aakwanezimo yokanona mboka anuwa taya longekidha efumbiko lyokanona, otaya indile moshigwana omayambindhindho kehe oshoka kaye na iiyemo yasha.