MVA fund a kumagidha aahingi ya hinge nawa pomahala pe na aanona
Ehangano lyoMotor Vehicle Accident (MVA) fund otali kumagidha aahingi yiihauto ya hingile po30km/h pomahala haga kala aanona ngaashi poosikola momapandaanda nosho tuu.
Ehango ndyoka anuwa otali kumagidha ngaaka okuyanda iiponga yaanona yosikola oshowo aanona aashona.
“Omahala ngoka ohaga kala aanona taya ende noku tondoka, inaaya tala nawa koombinga adhihe, onkene ngele omuhingi ota hingile pookilometa ndhoka ota vulu okukankama uuna yeya monene ko,” ya ti ngaaka.
Shoka otashi ka shunitha pevi noku hulithapo iiponga poosikola oshowo pomahala hapu kala aanona oyendji.
Ehangano ndyoka olya kumagidha oshigwana shi kale aluhe tashi lopota iiponga yomoondjila uuna ya holoka, meendelelo konomola 9682, mbyoka hayi ndhengwa oshali shamuhongi.
“Elalakano okukalekapo oomwenyo oshowo okuyanda iiponga yombaandhilila,” ya ti ngaaka.
Aalongi ya yooloka nayo oya gandja omanyenyeto oshowo omakumagidho nkene aahingi yoohauto yena okuhinga no haya hingi poosikola.
Secilia Martin omulongisikola okwa ti, ohashi uvitha nayi ngele aavali nenge aahingi yootakisi taya pitula po aanona posikola, ihe otaya hingi ohauto ya pwako yafa itaayi kankama omanga pena aanona taya matuka no taya ende.
“Ehala lyosikola olya pumbwa okusimanekwa kaahingi, oshoka opena natango aanona aashona unene mboka haya matuka ashike, meni nokondje yosikola,” ta ti ngaaka.
Otandi indile opo kehe osikola yili popepi no pate, yi kale yina aapitithi yopate, oshoka opena natango aanona mboka kaayeshi okupita nawa oopate.
Omulongisikola gumwe natango Lilie Shikongo okwa ti, oshinakugwanithi sho muhingi kehe kutya ita hingilile pehala lyina aanona nenge hapu piti aanona aashona.
“Oshike wuna okuhingilila mopate nenge pehala lyina aanona yosikola. Aanona ohaya landulathana, thimbo limwe oto ti oya pita nale nani inaya pwa ko, opena ngoka a li alandula ko,” ta nyenyeta ngaaka.
Ta ti, aahingi oyo yena okukala yena esiloshimpwiyu ndyoka.