Okaana kofikola va ti ka ekela shi okaana kako mokaanda
Okakadona komido 16 oke li moshipangelo taka mono omayakulo ounamiti nexungomwenyo konima eshi va ti ka ka mona okaana, take ka holeke mokaanda, ndele taka i kofikola -komuhandjo.
Okaana ka ekelwashi okamati, paife taka tengenekwa ke na omafiku atatu noke li moshipangelo shaShakati mefilishisho lovapangi. Oshiningwanima eshi osha ningwa mEtitatu momukunda Ohaziwa moshitukulwa shaShana.
Omupopiliko wopolifi moshitukulwa Inspector Thomas Aiyambo okwa hokolola ta ti okaana oke li tuwa kovanafikola Etitatu pefimbo kwa li tava di kofikola nokushivifila opolifi. Omunafikola oku li mondodo onhi-10 kEkulo Senior Secondary School ashike ina kwatwa po natango onghee omakonakono opolifi otaa twikile.
Omundohotola wopamadiladilo mouninsteli welongo Ayesha Wentworth okwa ti ouministeli wehongo ohau yandje omayakulo exungomwenyo melongelokumwe nouministeli woukashike kookanhu onghalo nawa yokaana, noshoyo okuyambidida okaana komunafikola ngeenge ita dulu okuyambidida okaana kaye.
Okwa ti ouministeli ouna opolongalama hai yambidida ovanafikola ve li moluhepo ngaashi oipumbiwa yofikola ile ngeenge omunafikola a mona okaana ndele okwa taalela omashongo okuyambidida okaana unene tuu ngeenge okaana ke likalwa kuxe.
“Konima ngeenge omunafikola a mona okaana ndele okwa li a lopotwa a hala okukapulashi okaana kaye ile a kwatwa komhepo yokukufa mo eteelelo ohatu kwatafana lovahongifikola voshilongwa oLife skills keefikola opo va kale tava ungaunga nomunafikola oo,” ta ti.
Okwa weda po ta ti ouministeli wehongo ohau kwashipaleke kutya omunafikola keshe e na oupyakadi itashi shindwa kovanafikola vakwao opo a kale a manguluka ngeenge e li mofikola nokulela aha ndje mo mofikola.
Eshi a kwatafana naKundana, omuxungimwenyo mouninsteli woukashike kookanhu nonghalo nawa yokaana Selma Shilongo okwa kumaida ovahongifikola opo va kale tava twala ounona vavo koipangelo ngeenge tava hepekwa koupyakadi wopamadilaadilo.
Okwa ti ovanafikola nava ka konge omakwafo koipangelo ile keembelewa douministeli woukashike kookanhu shaashi oku ekelashi okaana ka kushi e kandule po lomukundu.
Shilongo okwa yelifa ta ti ovanafikola vamwe ohava kala va kwatwa koshinyenu unene tuu ngeenge tate wokaana iha ya yambidida okaana kaye ile ngeenge eteelelo lelikalwa komulumenhu omanga vamwe ohava kala tava li pula kutya olyelye ta kala nokaana kaye.
Onghee naashi ohashi eta opo ina yokaana a kale a kwatwa komhepo yokukupulashi okaana kaye shaashi oha kala a lulilwa konghalo.