Sikolo sa Mbambazi sifumana lituso
Sikolo sa Mbambazi mwasilalanda sa Chinchimani, nesi imuluzwi kasamulaho akufumana lineulo kuzwelela kwabatusi. Labubeli sikolo nesi amuhezi neulo ya Lipula zamwaliofesi ni matafule azona zelobabañwi, zamasheleñi alikana N$48 860 kuzwelela kwakampani ya entrepo. Yomuhulu wasikolo sa Mbambazi Obert Simasiku naize neulo ikatusa hahulu kutatulula butata sikolo sitalimani ni bona.
“Kasilimo sa 2020, sikolo hane sibonahala kukatazeha entrepo nelufile neulo yalisebeliso zelikana N$90 000, kacwalo halukopanya selu amuhezi neulo yelikana N$140 000 kubona. Kacwalo luitumela hahulu kamusebezi obasweli kueza, mi habatusi feela Mbambazi kono basweli kutusa likolo zeñata mwanaha kaufela,” nekubulezi Simasiku.
Nabulezi hape kuli muuso unosi haukoni kulwala mutiyo wakubabalela likolo kaufela, kacwalo tuso kuzwelela kwatutengo twakwamukunda ya amuhelwa. “Maticele habasana kubilaela zalipula, musebezi ukapetwa hande,” nabulezi. Labune sikolo hape nesi fumani neulo yalisebeliso mokuipetezi libuka, liñoliso, mapampili, lipotoloto nizeñwi cwalo zeñata kuzwelela kwakampani ya Avril payment solution. Mwaliñusa kampani neize “kakufa neulo luna nisepo yakuli lutusa sikolo kuli baituti baitute hande, nikubona kuli bukamuso bwabona bwabukelezwa.”
Lisebeliso kaufela neli lekilwe katuso ya sintolo sesi lekisa lisebeliso zasikolo sesi luilwe ki Cletius Mushaukwa. Ili kanako yakutambeka lisebeliso naitamile kutusa baitutiti babashebile balishumi, ili basizana baketalizoho ni bashimani baketalizoho kakubafa liapalo zasikolo. Mushaukwa niyena unze abapala kalulotuna mwasikiliti kutusa likolo, mi ñohola nakile alekela hape baituti babashebile bamashumi amalalu kuzwelela kwasikolo sa Nankutwe liapalo zasikolo.