Commissioner Sakaria oye paife ta komanda omatanga mEtosha

Kakukutu komatanga opolifi moNamibia Inspector General Joseph Shikongo, okwa ulika Commissioner Naftal Lungameni Sakaria, opo a ninge omukulunhu wetanga lopolifi li lile po eameno loifitukuti mEtosha National Park. Eshi a popya naKundana pangodi, Shikongo okwa ti elalakano lokuulika Sakaria okukaleka po eameno loifitukuti moshikunino shoinamwenyo.

Sakaria okwa pingena po Deputy Commissioner David Sheehamange oo oye a li ta ungaunga noshikonga osho.

Sakaria oo e li kakukutu komatanga opolifi mOshitukulwa shaShana okwa ulikwa oshivike sha dja ko nota ka kala ta wilike omatanga oule weemwedi hamanho komesho.

Shikongo okwa yelifa ta ti konima yeemwedi hamanho ombelewa yaye otai ka ulika natango omunhu ou ta pingene po Sakaria, shaashi oshinakuwanifwa osho ohashi longwa ashike oule weemwedi hamano.

“Ohandi ka kwashipaleka kutya oifitukuti oya amenwa. Ohandi ka xwaxwameka ovanambelewa tava longele kEtosha opo va longe nondjungu okukaleka po eameno loifitukuti,” Sakaria ta ti. Sakaria okwa weda po ta ti ombelewa yaye otai ka kwashipaleka kutya ovanambelewa hava longo mEtosha navo ove li meameno opo vaha longelwe omunyonena kovafekelwa. “Ngeenge onda udu kEtosha National Park kwa longwa oshimbuluma ohandi i ko novambelewa vopolifi vange vomOshana opo tu ka konge ovafekelwa ovo nokukala twe va kwatwa po diva,” ta ti. Okwa indila oshiwana momidingonoko da dingilila Etosha National Park opo va longele kumwe novambelewa tava longele kEtosha. Okwa ti yoo opolifi oya tula po ‘okati kokeenyala’ kokeenyala onga olupandu laau taka yandja ouyelele una sha naau taka yandja oyelele unasha novalunga voinamwenyo.

Omunhu keshe ta ka yandja ouyelele kombinga yovanhu tava dipaa oifitukuti moshikunino shoinamwenyo, Etosha National Park ota ka pewa olupandu loN$50 000. Sakaria okwa kumaida oshiwana opo shi kale tashi yandje ouyelele u na sha noulunga woinamwenyo, a tashi dengele kongodi yonomola 55555.

Okwa didilikwa oifitukuti mEtosha National Park ya ninga oihakanwa yokudipawa kovakwashiwana have li tete odalate yoluumbo noku li vakela mEtosha.