Eswatini a ipatana omwiyo gwoongunga dhaTaiwan
Eswatini okwa ipatana omapopyo t ega ningwalwa kutya okwa longitha omaliko goshilongo onga omwiyo opo a pewe oongunga kepangelo lyaTaiwan nongele okwa ndopa oku dhi futa nena omaliko ngoka otaga ningi po gaTaiwan.
Onzokundaneki yokomalungula yimwe moshilongo oya li ya lopota kutya epangelo olya uvanekela Taiwan kutya otali ka gandja po iinima (omaliko) iyali yoshigwana ngele olya nyengwa okufuta oongunga.
Eswatini okwa kutha oongunga kombaanga yimwe yaTaiwan yedhina Exim bank for the construction of the International Convention Centre and Five Star Hotel (Fish) – nelalakano okutunga omatungo gepangelo niinyangadhalwa yilwe yepangelo. Momushangwa gwa pitithwa kepangelo oshiwike shika, ominista yomayambulepo nehumokomeho moEswatini Thambo Gina okwa ti ye ke shi sha nande kombinga yetsokumweuvathano ndyoka tali popiwa. Ta ti oveta inayi pitika okutula mowela omaliko goshilongo ngele taku kuthwa oongunga. Gina ta ti omushangwa ngoka gwa pithithwa koshikundaneki ogwa eta etumpakano enene notashi ikwatitha ombandamutse oshoka osha gandja ethano ewinayi kombala nokookuume ka Eswatini”. “Omauvathanotsokumwe gepangelo lyuukwaniilwa waEswatini nepangelo lyoRepublic of China (Taiwan), ngoka g azi koomvula dho1968, ogongushu yopombanda, oge li melandulathano noge li meni lyoongamba dhekotampango nooveta dhoshilongo,” Gina ta ti.
Ta gwedha po kutya iilongo mbyoka iyali oyi na omatsokumwe ngoka taga wilike omauvathano kehe haya ningi nomatsokumwe ngoka oge li muuwanawa wiilongo ayihe iyali no itaga thengenyene po nande oshimwe shomuyo.
Eswatini oye owala oshilongo muAfrica, noshi li shimwe shomiilongo 14 muuyuni mbyoka ya panga nokukaleka po uukuume naTaiwan – ngoka a itaala ko onga oshitopolwa sha ikutha ko kuChina.
Taiwan naEswatini otaya tyapula edhimbuluko lyomimvo 55 dhelongelokumwe muSepemba nuumvo.