OPH a yambidida oshipangelo shaNandjokwe neshina lokufaneka
Ondangwa Private Hospital (OPH) oya yambidida oshipangelo shaNandjokwe neshina shokufaneka nokukonakona omikifi molutu li li pongushu yoshimaliwa N$800 000.
Oshipangelo eshi shopaumwene osha yandja eshina eli mEtitano notali ka kala tali longifwa okuyandja omayakulo okufaneka kovanaudu. Moshipopiwa shaye pefimbo ta tambula ko eshina, omunambelewawiliki mouministeli wouhaku nonghalonawa Ben Nangombe okwa ti ovanashilonga voundjolowele itava ka longa vali noudjuu shaashi paife ova mona eshina lokufaneka nokumona mo omikifi da yooloka.
Nangombe okwa ti oshipangelo shaNandjokwe osha kala shi li momhumbwe yomashina okufaneke onghee eshina eli otali ka eta elunduluko la kula molwaashi ovanaudu itava kala vali tava tuminwa koshipangelo shaShakati ile koshipangelo shopaumwene ngeenge va pumbwa okufanekwa.
Okwa weda po ta ti oshipangelo shaNdangwa ota shi ka yandja yoo vali omadeulo kovanailonga voundjolowele hava longo mOnandjokwe nghee ve na okulongifa eshina olo. Nangombe okwa ti oshipangelo shaNandjokwe osho shimwe sha totwa po omanga oshilongo inashi manguluka notashi twikile okukala tashi yandje omayakulo opaunamiti kovakwashiwana. Okwa weda po yoo vali ta ti ouministeli wouhaku owe lipyakidila noku tunga oshaala yomeme yokupulumununa, oyo tai tungwa pa mu fika u li pombada notai ka kala oyo imwe ya kula moshilongo. Moshipopiwa shaye omukulunhuwiliki woshipangelo shopaumwene shaNdangwa Omundohotola Akutu Munyika okwa ti elalakano lokuyambidida oshipangelo shaNandjokwe okushakeneka epangelo ondjilakati unene tuu moshikondo shouhaku shaashi osha fimana ngenege moipangelo nuna oikwafifo yokulongifa.