ǂGari-aon ge !Naniǀaus !nâ ǁgoe barden !û-aiba xu go !haeǂuihe
!NANIǀAUS - ǁAupexa 60 ǂgari-aon hîa !Naniǀaus !nâ māams ose !û-aiga sîenūs !aroma ge doesin ge ǀgūǁae ǁnāpa xun nî ǂoas ǂanǂansa ge !khō!oa. Kunene ǀkharib ge ǁaupexa !nani kuriga ǁkhōǁkhōsa ǀkhurub xa go !khō!namihe hâ i.
Nēs xa ra !aromahesen ge ǀnî ǂgari-aona !gâi !û-aigu hâ !â!âgu ǁga ûitsamaxūn âna gere !nari-ū, !âs xa ǁōsa ǁkhaes ase.
Kuneneb ǀkharib !nâ gu ǁîga hoan xa !gamse ǀkhurub mâsib xa tsâǀkhāhe hâ !âgu ge ǂgaiǀons ai, Opuwos Kai!ā !âb, Opuwos !Garo!b !âb, Epupas, Khorixas tsî !Naniǀaus hâna.
New Erab ge !khō!oa ǂans ra mîsa !oan ge ǁnā ge doeǂgâ ǂgariaona ǀguis khami i ǂan-i tamas ka i o mā-ams ǂkhanin hîan !hao!nāsi ǂgaeǂguisa xu nî !khō!oan ase ge hâ i tsî nē !ûǂams !aroma ǁnâu!gâ!khaib kōse ge sī-ūhe. “Nēpan ge hā- on ge ǁîna māams ose ge hā. Mā-ams ǂkhanin osen go ǂgâxahâ on nî ǂoa, ti hâ mîmāsan ge ǁnâukaisen tama i, o da ge ǁhōba ti beros !nâ-ū !aub!ûi!gâs !nans di mâxōǀkhās ǀkha ǁnâu!gâ!khaib ai ge !nuri !gâ ni. ǁNâu!gâ!khaib di ǂkhanis ǁîn nî ǂoa !khaisa ra māmās xa !aromahe hâsen ge ǀnîn âna go doeǂoa.
Naun hîa nēs !nâ māsen taman ge, ǁgaris !naka ǁnâu!gâ!khaib mā-ams ǀkha nî ǂoa,” tib ge !Naniǀaus Namidaman !Hao!nāsi ǀHûhâsib di danab, Jeremias Gaobaeba ge mî.
“Hoada gen ē ǀkharib !nâ ǀkhurub xa !khōhe hâ tsî sida tsîn ge ǁîn ǁnān khami ûitsamaxūn tsîna ūhâ, ǁîn !aroma da ra ǂhansenna. Hoaran ga ǁîna dī hâ !khais ge !hao!nāsi ǂgaeǂguisa ǂan!gâ, !gomnsib âna ǁgui tsî da ga ǀhûǁarebese mâti da nî !khōǁôagu !khaisa kō hâsa, xawen ge ǁîna !gôasi-o!nâse ǀgaiǂgâxas ǀguisa ge dī,” tib ge Gaobaeba ge !khariu!kharu.
Ai!âb ǂgaeǂgui-aoba gere mîs ge, !Naniǀaus kaise a ǂâsa tsî ǂhanub mâxōǀkhāsa ǀgaisase ǂhâba hâsa nē ǀkhuruba mâ!kharus ase.
Nē ge doeǂoa kaihe ǂgari-aon di ǀguib Kakeke Mbingeb ra mîsa !oan ge ǁîn hâ!â !â!âba kaise a ǂâsa tsîn ge ǁîna kaise !gomma ra tsâ tsî ǁnā-amaga ra ǂhansenma. Mbingeb ge ge mî, ǁîb omaris ǀkhan ge nēpa xu a ǂoa kaibahe !aromas, ǁîn ge !aub!ûi!gâs !nans !âb !nâ ûitsamaxūn âna gere !ûre
kai amagasa.
ǁNā ǁhûi!nâǂharis di ǂgiǂgosi ǀawemā-aob tsîn ge nē !khaisa !khō!gâ tsî ge mî, ǁîn di !haeǂuihes ge ǁnâu!gâ!khaib xa a mā-amhesa ǁîn ge !aubǀgurun !û-aib !nâs a xui-ao.
Nē mâsib ge khoen tsî !aubǀgurun ǁaegu hâ !omgude ra !aroma, ǁnā ǀkharib !nân !gōsase xamn tsî ǂkhoana hâ amaga.