Namibiab ge 7 421 !hūsabeǂan!gâsa ra ôa khoena ūhâ
Namibiab ge 7 421 khoen hîa !hūsabeǂan!gâsa ra ôana !khōǂgā hâ, ǁîna xun 6 420 Demokratise Republiki Congob(DRC) diba xu hâse. Nē !gôab ge ǂguisib !nâ tarekhoedi tsî ǀgôarona xu hâ. !Nakaǂnôa Ministeri Daniel Kashikolab hîa Ministeris !Hūba xu ǂoas tsî ǂgâxas, !Norasasib tsî ǁAwosasib dis dib ra mîsa !oas ge DRC !nâ hâ ǁawosao!nâsib tsî !omgudi tsîna !hūǁîn nî !hūba xu omdi âna ǁnāxūmâi tsî !hū !khaisa ra !aroma.
“DRCb ge kurigu!oede ǁâtanisens ǀkha hâ !khamgudi tsî ǂgiǂgosi hōgu tama idi ra hā-ū ǁawosao!nâsib tsî noxopa ǀnîn ge ra !aroma miljundi !nâ hâ khoen !auga!hūgu ǁga ra hâ!khai-ôa !khaisa. ǂAuna !gôab !nâ hâ DRCb ǁanǂgāsaben ge !hūba xu ra ǁhai in ǂkhawadīb, !gôa!gonhes tsî sâuǁkhāsib ǂkhawusasiba xu ûiǂoa,” tib ge Kashikolaba gere ǁgui!ā.
!Gaeǁaresa !Hūgu ǀGapi Komisareb !Hūsaben (UNHRC) !aromab, māǂui !nurigu !nâ i ge ra mîhe, ǁnā !hūb di omgu, ǂurusib sîsenǀgaugu tsî ǁgau!nâs dīǀgaugu ge kurigu di ǂkhawadīb tsî !khamdi xa kaise a ǂkhawu kaihesa tsî nēs ǀkha ǁanǂgāsaben nî !gao!gao !oabade sī!nâ tsî tsēkorobe ra hâ !ēde sîsenū tsî ûigu ân mâsiga nî ǀkharaǀkharas īǁkhāsiga mā tama ra īsa. Nēdi ge a !aroma ǂgui !gôab di DRC ǁanǂgāsaben nau !hūgu, Namibiab tsîna !khōǂgā hâse, !hūsabeǂan!gâsa hōsa ra ǂhansenbasa.
“Sida ǂhanub ge !hūsaben tsî !hūsabesisa ra ôa khoena harase ge !khō!oa. ǁNā-aman ge DRCba xu ǂauna khoena Namibiab ǁga !hūsa ra ǁkhore ǁîn ǁawosasib, !norasasib tsî !gâi ûiǀgauba ra mûǂui amaga,” tib ge Kashikolaba ge mî. !Hū!nāsi ǁHōn di ministeris ge ǁîs di !auga!hūsi !hūsaben proxrammi !nâ-ū nî ôa-am UNHCR xa !auga!hūsise a ǂan!gâsa !nona oredi hîa ra hâhâde !khōdana, sîsenǂui tsî ǁawosasiba nî mā.
“Nēn hoan ge Namibiab !Hūsabena ǂAn!gâs tsî Mûǂams ǂHanumās 1999ǁî kurib dis ǁgaragu, 1951ǁî UN Mîǁguib, 1967ǁî kurib !gûǁnâǀgaub hîa !hūsaben mā!harodi ǀkha a !gaeǁaresan tsî 1969ǁî kurib di OAU ǀHaos hîa !Hūsaben !gomsiga Afrikab !nâ sîsenūs kha a dīxūxas hân !naka ra dīhe,”tis ge ministerisa ǁîs mariǂnûiǂuis !nâ gere mî.Ministeris gen ē proxrammi di ai!gûs !aroma N$10 miljunsa ǂnûiǂui hâ.