Ovanhu 54 va monika malaria mOmusati neudo
Omukulunhuwiliki wouhaku moshitukulwa shaMusati Alfons Amoomo okwa ti omukifi womalaria onghee ta u twikile nokulopotwa komikunda da yoolokam oshitukulwa. Neudo ovanhu 54 mOmusati ova monika oshidu shamalaria omanga omudo wa dja ko ovanhu efimbo ngaali kwali kwa nomika ovanhu veli 412 ve na omalaria. Amoomo okwa ti oshipangelo shaUtapi osho shimwe shina omivalu di li pombada novanhu 28 va monika malaria, oshipangelo shaShikuku 18 omanga Okahao vahamano. Okwa koleka ta ti fiyo opapa ka pena omunhu a lopotwa a fya koshidu malaria. Amoomo okwa weda po ta ti ovanhu 38 vomwaavo va monika malaria Ovaangola. Ta ti ova ova dja koshilongo shavo va kwatwa kumalaria ashike ova ningilwa omakonakono noku monena ouhaku koshipangelo shaUtapi. Okwa ti omikunda di li da kunghula neengaba da Namibia naAngola odo unene da didilikwa ku na ovanhu vahapu va monika oshidu shamalaria unene tuu ovakwashiwana Ovaangola ovo have u ya okukonga omayakulo opauhaku moNamibia
Okwa hokolola ta ti nounona ve li koshi yeedula nanho navo ova didilikwa va ninga oihakwa yoshidu malaria molwashi hava lika keemwe ngeenge va nangala shaashi ihava kala va tuvikilwa monete yokukelela eemwe. “Ombelewa youhaku oya ninga eenghendambala dihapu okukondjifa malaria eshi twa kala nokutuma ovanailonga woundjolowele komikunda da didilikwa dina malaria opo va ka yandje ouyelele moshiwana nghee shi na okukala she li a mena kumalaria,” Amoono ta ti. Amoono okwa ti ovanailonga wouhaku ova tameka okupombela omiti momaumbo ayeshe komikunda kwa monika malaria opo kukelelwa etandavelo loshidu omalaria.
Okwa weda po ta ti ova taalela eshongo linene lovakwashiwana vamwe vehe hole meenduda davo ta mu twiminikilwa kovanailonga vouhaku. Onghee okwa ti osha fimana ngeenge meenduda ta mu twiminikilwa omiti opo ku kelelwe etandavelo lomalaria. Okwa kumaida oshiwana opo shi kaleke po eenhele davo da yela efimbo keshe, novadali opo va kwashipaleka kutya ounona vavo ove li mefiloshisho lokukala va tuvikilwa meenete dokukelela eemwe.