N$4.9 miljun maris ǁkhāsiba ūhâ ûitsamaxūn ge Zambezib !nâ ge !narihe
Zambezi ǀkharib di ǀawa!namn ge ge !nuri, 824 goman hîa ǀhaob ai N$4.94 miljun maris ǁkhāsiba !khōǂgā hân ǂoa ge kurib di !Hoaǂkhaiba xu nē kurib di !Hoaǂkhaib ǁaegu !narihe hâsa.
Ûitsamaxūn !narib ge dana ǁgoaǂuis ase Zambezib di ǂgari-aona ība, !nari-aon ra ûitsamaxūna Zambiab di mû!gâhe tama !hūǀgoras !nâū ǁgari!khau amaga.
!Nāsa !nāden ge ǀkharisi ǂgiǂgosi ǂgaeǂgui-aon tsî ǀawa!namn tsîna goma!narib !nae!khaide Zambezib !nâ ra hō!â tsî nēs xa ǁgoaǂuis ase ībahe. !Nari-aon ra gomana Namibiab tsî Zambiab di !hūǀgoras !nâ-ū ǁgari!kharu-ū tsî ǁnāpa supu ǂganǀgaub ai ǁamaxū amaga.
Zambezib di ǀKharisi ǂKhawadīb Ôa!nâdi !Khōdana-aob, Kenneth Simbwayeb ge New Eraba ge mîba, nausan !Hoaǂkhaib 2022ǁî kurib diba xu a !narisa goman di !gôaba 824 ai mā, xawen ge ǀawa!namna !gâi!gâxase 367 goman hîa ǁkhāsib âna N$2.53 miljuns ai ǀnōhena a hō-oasa.
ǁÎb ge a ǂan!gâs ge N$2.42 miljuns ǁkhāsiba !khōǂgā hâ 457 goman noxopa hō-oahe tama hâsa.
Nē ge hō-oahe !narisa goman di !gôaba xub ge !nāsa ǀammi 755 goman diba Namibiab !nâ ge hōhe tsî 69 goman ǀguina Zambiab !nâ.
Namibiab ǀawa!namn ǁnā ǀkharib !nâ hân ge 62 ǂâisāhera goma!nari-aona !khōsis !nâ ge ū, ǁîna xun 25 a Namibiab !hūǁî, 33 Zambiab !hūǁî, !nonana a Angolab di tsî ǀgui-e a Motswanab dise.
Simbwayeb ge ǀgoa!narib ǂnamipe sao rana!aromadi ase gere ǂgaikhâi: haiǀgomdi, ûitsamaxūn ǀhonkhoen di ǁaetama īsib, daosaode ūhâ tama ûitsamaxūn, !nubusib ûitsamaxūn !gôaga xoamâis dib, ûitsamaxūn hâ ai xawe ǁanaisa tama !garo!ādi, ǂhanusise xoaǂgāsa tama ǀgoa!ûi-aon, hâmas ǀguisa ra dī ûitsamaxūn, tsî noxopa ǀnîna.
Ai!âb Simbwayeba !hau!hausase gere mîs ge, Zambezi ǀkharib nēti ra hō-oahe ûitsamaxūn nî ūhâgara!nâhe ǀhonkhoen nî hā ǂanǂuis kōse !khai-e ūhâ tama hâsa.
ǀNî ǁgoaǂuis hîa Simbwayeb ra mîsa !oa hâs ge, Interpolsa xu ra ǂgaoǀkhāhe mā-ams hoa !hūkha xu nē !narib ǂnamipe ôa!nâde dīs dis, kaise gaxuse ra ūsa tsî ǁnās ǀkha gaxu ǁaeba ôa!nâdi dītoas ǁaeba ra gaxugaxusa.
“Sida Interpols !ereamsa !âu hâ hîan ge !nari-aona ǀnai gomana !nūse bē-ūhâ,” tib ge gere mî.