Nokampani donomina kufuta vaHompa yimaliwa nsene vana hingire mosigongi
OKOMBAHE- edinguro lyokomitiye zombongarero zanavenye komukunda gwa Daures kuna zegurura nye ndi asi kuna tura nayinye poruzera kweyi ayizuvhayika ntani noveta nye edi dakara momukunda gwina. Nompitisili dopampo kavatambwire asi awo vatura rudi rwawo moudigu morwa kwatambwire asi vagwane yimaliwa nsene vanahingire mosigongi. ‘’ Ose kumona tupu vantu vetu vana kusima, vahana kututantera asi ngapi vanagendi vakasike pevango olyo. Makura awo kututantera asi nsene tuna kara nomapuro tuze kepangero lyetu,’’ yimo ana kutanta Hompa go Tubusis, David Goreseb.
Goreseb kafatwilire momunene kuhamena yiviyauka yonomina moOkombahe ntani nofarama edi dakundurukida kokomitiye zombongarero zanavenye zokuhamena korunone rosirongo momandaha gana puko. Epuragero lyangesi kwawizirapo paapa silyo sombongarero zanavenye gwaLPM Henny Seibeb, ogu gahundilire epangero asi vahagekesepo Lithium omu navatulisapo elikwamo lyokutara asi mulyo musinke guna kara mevhu ntani asi kupi vagwana epulisiro momukunda horowero ogu. Makura komitiye ozo kuna karamu nye Tjekero Tweya, Kletus Karondo, Maria Elago, Maria Kamutali ntani Bernadus Swartbooi ava vana kurugana mapuragero gana kuhaga mungura. Vahompa navenye womomukunda kavavandindilire ngano vayakare posiogongi, nye gumwe tupu Edwalt Neib gomo Urikrens kayamonekere. Goreseb katente asi ministeli zonomina kwavagusako unene koyinamina nkenye mbapira avagwana kuzigava Hompa gelike. Kuna karapo udigu momagwanekero pokatji konompitisili domukunda ntani vatungimo. Yiyonye yaninkisa asi vantu vawize vayarugane yonomina momukunda pwahana asi paveta. Makura nose yiyo nye tupu atutara morwa kapi tuna kara negwanekero lyewa. Morwa mukaro nye gwangesi nkarapamwe kuna kara noudigu morwa nomina dimwe kuna kara nye konyara 300 m vasike komambo govantu.ntani kuna karako udigu wokuzonagura mema morwa awo kuna kusima makero gomema pepi novantu.
"Ose kapi twadiva asi wolye vana kara momukunda gwetu.’’ Ose kumona tupu vantu vana kuwiza makura tavatameke kusimagura. Ano vamwe kugasiga makero ogo vahana kugafofera. Neib, koruha rwendi katente asi awo vamona asi kuna kusima makero koruha rwa Tubusis, Kettlefarm ntani mavango peke.
Mokukwama mwendi, mina zimwe nare zaduka konyara nomvhura ntatu, ano edi dimwe ngesi nomvhura ntantatu kapi vana rugana hena.
Ado kwekere nawo nye ngesi vadisiga. Ngesi kuna karamu mema gomanzi, makura yimuna kugwa momakero ogo, morwa kwato darate zakarako, yimo ngoso ana kutanta. Neib katente asi awo vagava udigu ou koministeli nye dogoro ngesi kwato eyi vana ruganako. Nye vanafarama kuna kuzumbanesa yimuna yawo. nampili ngoso, gumwe gokomitiye Swartbooi kapulire Hompa asi morwa sinke nye vapilira kuruganesa nonkondo dawo apa vamwene asi ava kuna kurugana unamina pwahana asi paveta. " Nsene asi ove kuna kuhuyunga asi wakara nononkondo, yinke nye wapilira kuyihagekesa nayinye eyi? Morwa ove nyovenye mwenya ekungo lyorunone oru? Nye Daures Daman kansela kapi kageve uzera nampili nakauke opo nye kavamupulire asi kuvafuta moufuki, ntani kurandesa yimbapira eyi yapumbwa kuyigava varuganeseko vanangesefa owo. Vamwe vawo kavapulire asi kuvafuta nsene vanayahingire posigongi, awo kuvafuta kampani zimwe zovaChina nokuvapa mauhwi gamwe ngoso, ntani vanyatera eruganeno kumwe nokampani zaChina Xinfeng Investments. Vatungimo kavamwene udigu nampili ngomu asi vahompa vawo kapi kavakerepo.
Johannes Gariseb kayinkondopekere asi nompitisili dopampo kwagava nombapira ko Xinfeng varugane ngesefa. Ose kwarugana epuko kovantu vetu, nye ngesi tuna lirongerepo. Nokutanta asi ose kwanyatera kuruganena kumwe nokampani ozo. Gumwe mpitisili gopampo, Entenesia Tjiveze nage gumwe katambwire asi awo kugwana yimaliwa nsene vanahingire posigongi kumwe novanangesefa. Awo kugwana N$400 ngoso.
Ntani vakansela nawo kugwana yimaliwa yawo. ava nye vakara nono EPL kugava kwankenye kansela N$400. Ose kapi atuvasininike ndi asi tuvapure asi vahepa kufuta koyo yimbapira yetu, yimo ngoso ana kufaturura.