Vaporosi momukunda Zambezi kavagwene yirandwesa yahana asi paveta
KATIMA MULILO- vaporosi womomukunda gwaZambezi mosikondovike kavagwene yirandwesa yokulisiga siga yahana asi paveta, eyi vana kugazara asi hambara vayirete moNamibia ndi hambara yipwage ponze zosirongo kovamusinda ngwendi Zambia mokuyipitisira pomavango aga gakara asi kapisi gopaveta.
Yirandwesa oyo kavagwene kuna kara nye 30lt zomaholi, nondini mbali do 25lt domaholi, ne do 5lt domaholi, ntano 10lt domaholi ntani nondini 70 domawokowoko. Yimwe oyo yina karapo kuna kara radiotors mbali, mawato gavali, nombasikora ntatu, yikorwesa, yipakote yomakanya, ntani vapoto ntani yopampo nye ngwendi yipundi, nomate, nombere, yikumba ntani yikombeso. Mberewa zovaporosi zomukunda kavatulisirepo sirugana vatare asi yinke yina kuhoroka sirugana esi sokuzeresa kwatameka mo 28 Kudumogona. Efukunyo eli ngaliza dogoro mo 30 Kudumonkuru 2023 omu vanakurwanesa ukorokotji momukunda, unene ukorokotji ou wokuteza mambo. Apa nye kahuyungire siruwo sokugava mbudi kupitira movanambudi, muhuyungilipo vaporosi womomuknda gwaZambezi Kisco Sitali, kageve mbudi zokuvarondora asi vaporosi momukunda ngesi kuna kurugana uenene omu vana parapo asi vagusemo ukorokotji momukunda.
Age simpe katente asi sinzi soyo kavagwene kavayizumbire ndi vagazarerwa kavadukire vasige yininke yawo opo kavamwene asi vaporosi kuna kuwiza. ‘’ Ose katumwene asi yininke yinzi eyi, ntani yimwe kuna kara asi kapi vayisilika kuyireta moNamibia morwa vantu kuna kumoneka asi kapi vana hara kufuta mutero ponomurudi, makura awo tavazi nye komavango vapira kupulisira asi ngano vapitisirepo oyo vana hara kukarandesa. ‘’ Awo kuna kuzumbanesa yininke yawo yomulyo, nampo hambara tupu vafute yimaliwa yoyisesu pomurudi, opo nye vana kuhwilira noyo vana kuretamo. Ose kuna kuhundira vatungimo asi vahepa kuruganesa mavango aga gakara asi paveta ntani vahepa kuhundira varugani konomurudi asi yinke vana hara kureta mosirongo yipo asi vahakara nezumbaneso lyangesi, yimo ana kutanta Sitali.
Age simpe kafatwilire asi eyi vana gwana ngesi awo tavakayipunura, nokukaytjanga mobuke.
Ano konyima nye zosiruwo, vanamberewa vakara nosinka oso, ngavakara nye netokoro asi yinke yina kukwamako, ano mokugwedako yimwe ngava gava kepangero, eyi nye ngava karandesa kupitira mesunda. Ano eyi nye yina kara asi kapi ava yirandesa mesunda oyo yahepa kukayihwika nomundiro.