Ovakalimo vomodoolopa yaNdangwa tava ndjolola momeva onyata
ONGWEDIVA - Ovakalimo vaNdangwa moshitukulwa shaShana ova nyona po ondobe yomeva a nyata oyo i li moExtension 9.
Omeva onyata oo e li mondobe omo okwa tongwa kutya ohaa di momaumbo opopepi ngee ovanhu va pomba oundjuwo wavo.
Omeva ohaa pitile nee mominino dakula odo hadi ka tilashi kondobe oko.
Omupopiliko wodoolopa yaNdangwa Petrina ShitalangahoMutikisha okwa popya kutya eendobe odi na shili onduba yeeshi.
Ashike nande ongaho itadi dulu lela okuliwa shaashi ohadi kala momeva e yadi ondova neenghono onghee inadi nyika oukoshoki.
“Otwa mona kutya ovakwashiwana osho yoo ovandjololi veeshi ova ponokela ondobe ei, opo va dule okukwatamo eeshi odo di li momeva a kaka,”Shitalangaho-Mutikisha ta tumbula.
Okwa tonga yoo kutya eeshi edi ohadi ka landifwa moshiwana.
“Ohatu kunghilile ovakalimo vaNdangwa vaha lande eeshi doludi eli osheshi oda dja momeva onyata doo inadi wapala okuliwa,” omupopilko wodoolopa ta yelifa.
Okwa tongwa kutya ondobe yonyata okwa li ngaho ya tulwa moluumbo le i dingilila, ndele paife odalate yoluumbo kai ko vali.
“Odalate oya vakwa ko kookalyamupombo vehe shiivike,” Shitalangaho-Mutikisha ta weda po.
Kansela moshikandjohoololo eshi vati natango okwe lipyakidila nondungedilaadilo yokukandula po omukundu ou.
Oku na yoo vali ohokwe nehalo lokuamena ovakwashiwana vaye unene tuu ovo taadulu okuninga oihakanwa yokulanda eeshi doludi eli.
Ota indile yoo ovakwashiwana vopopepi nondobe yonyata va kale omesho nomwatwi aye mokutala nokupwilikina ou ta ka kwata vali eeshi mondobe omu ile ta ka landifa eeshi da dja mondobe yonyata.
Mutikisha okwa wedapo yoo kutya, ou tuu ta ka monika ile a hangika ta ndjolola ile ta landifa eeshi edi otaka longwa naye lela koveta yaNamibia.
Ovakwapopepi nondobe ei natango ova pewa yoo oufemba wokulopota ovanhu ovo kopolifi ile kombelwa yakansela.