Ondjala moAngola tai indilifa ounona oimaliwa
■
Taimi Haihambo
ONGWEDIVA - Omuhoko wOvazemba uhapu konyala owe lihanena oshitopolwa shanooli moNamibia molwondajala. Okwa tongwa kutya ovanhu ava ova dja moAngola va tauka ondajala oshoyo oluhepo olo la nyaa keonga moAngola.
Okwa tongwa yoo kutya ovadalakadi nounona vavo ova tuaka ondjala moAngola nove ya okukonga ouxupilo moNamibia. Omuhoko wovanhu va shiikava nawa nedina Ovazemba ove lihanena edoolopa konyala adishe danooli tava landifa omaluko oshoyo eedibo kOvanamibia efimbo alishe.
Okwa didilikwa kutya paife ove li momwaalu uhapu lela ndele aveshe ohava landifa ashike oinima ye lifa, omaluko needibo. Paife shaashi oinima oya hapupalela Ovanamibia ihava lande vali lela oinima yavo shaashi oye va ningila ihapu. Onghalo ya tya ngaha oya etifa nee ounona unene tuu ava vashona va tameke okukala ve li poivelo yeefitola osho yo peepate tava indile ovanhu oimaliwa efimbo alishe.
Nghipandwa Stefanus oo e li umwe womwaava hava kala tava pulwa oimailiwa kounona ava, okwa tumbula kutya yee okwa loloka okukala ta pulwa oimaliwa keshe efiku. “Ame naame ondi hadi oinakuwanifa yange yopaumwene ndele ohandi kala ashike handi havaleke ovanhu ava oimaliwa keshe efiku tava mono nge,” Stefanus ta ti.
Ounona vahapu vOuzemba ova tonga kutya voo ohava tumwa kooina ve uye va indile oimaliwa noikulya kovanhu. Ova weda po yoo kutya oimaliwa noikulya ei hava kala tava indile ihave i kumu nande nande, ohave i twala ashike kooina pefimbo lokomatango eshi tava shuna komaumbo. Ova popya yoo kutya ngeenge fiku olo ova kala inava pewa oshimaliwa ile oshikulya komunhu ohava ka nangala ashike inava makela.
Umwe womongudu yOvazemba okwa tumbula kutya vahapu vomuvo kave na lela apa hava di, onghee ohava nangala ashike momalukanda omo, ile poivelo yeefitola. Okwa weda po yoo kutya oimaliwa ei hai longwa kounona vavo ohave i tula kumwe opo va dule okulanda oifima momatala.