Opolifi yaShana molukongo lomulumhenu ta fekelelwa edipao
ONGWEDIVA - Opolifi moshitukulwa shaShana oye lipyakidila nokukonga omulumenhu ehe shiivike kedina konima eshi vati a mbodaula omukainhu weedula 24 neembele fiyo omefyo.
Omukuinhu weedula 24 womomukunda Oshalongo moshitukulwa shaShana, okwe lituwa onghela a fya vati konima eshi a hangika a tuwa neembele komufekelwa ehe shiivike nokufaduka po. Okwa tongwa kutya nakufya okwe lituwa mEhenye mOshakati konima eshi a monika komukwashiwana oo a shivifila opolifi kombinga yoshiningwania eshi. Nakutwa omukainhu neembele poshiningwanima ina hangika po, hano okwa hangika nale a faduka po vati.
Okwa tongwa kutya nakufya yee vene okwa kala ha di molukanda laShoopala pefimbo a li ha di Oshakati omo ina ninga lela oule wefimbo.
Omufekelwa nonande natango ke shiivike kedina nokolupe, opolifi oye lipyakidila nokukonga omufekelwa ou. Opolifi natango otai pula ekwafo moshiwana opo shi vatele apa tashi dulu molukongo lomufekelwa ou. Okwa tongwa yoo kutya ou ta ka yandaja ouyelele u na sha nedipao eli itaka tongwa nande okedina.
Omupopiliko wopolifi yaShana Thomas Aiyambo ota kunghilile oshiwana shi xulife po okweenda efimbo loufiku. Okwa weda po kutya ovakwashinwa ngee otava ende kwa toka, nava ninge onghendabala alushe va kale hava ende moungudu opo va dule okuliamena ngee va hangwa koudjuu. Okwa weda po yoo kutya ovanhu inava enda enda vali meeshana, momilamba oshoyo momangade efimbo loufiku shaashi kave shi efimbo omutondi e va teelela. Ovakwashiwana nava kale yoo ve na eengodi dopolifi efimbo keshe, nuuna va hangika koudjuu nena otava dulu okudengela opolifi noupu. “Onatu kaleni yoo hatu kuu mokule ngee twa hangika, opo ovanhu vopopepi navo va dule okuvatela,” Aiyambo ta weda po.
Molukongo… Omupopiliko wopolifi yaShana Thomas Aiyambo ta pula ekwafo moshiwana shi yambidide mokukonga omufekelwa ou a dipaa omukainhu.
Efano: Otwe li pewa