Ovanadolongo ve li momhumbwe yoikumbafa nomatalashe - Hamunyela
Omukulunhu koshikondo shomavyulonghalo moNamibia Commissioner General Rafael Hamunyela okwa ti omavyulonghalo okwa taalela eshongo linene lovanadolongo ve li momhumbwe yomatalashe nomakumbafa.
Hamunyela okwa ti unene tuu pefimbo eli, ovanadolongo otava dengwa koutalala molwaashi kape na omakumbafa noshoyo omatalashe okutula keembete.
Okwa weda po ta ti ovanadolongo ova pumbwa yoo vali oikutu oyo va pumbwa okudjala ngeenge ve li modolongo.
Edi Hamunyela okwe di popya pefimbo a ninga eenghundafana naKundana Etitatu omo a hokolola ta ti omwaalu wovanadolongo tava i komavyulonghalo otau ende wa uka pombada efiku keshe onghee naashi osha eta opo omatalashe a kale inaa wana okuyandja kovanadolongo aveshe shaashi ova ninga vahapu paife.
Okwa hokolola ta ti oupyakadi woshimaliwa inashi wana koshikondo sheedolongo nawo owa eta eshongo linene komavyulonghalo shaashi oikwafifo imwe ihai dulu vali okulandwa.
Onghee okwa ti ota indile ovanangeshefa,omahangano opaumwene noshoyo ovaleli vopapolitika opo va yambidida omavyulonghalo noikumbafa, omatalashe noshoyo oikwafifo ya yooloka.
“Oshafimanangeengetatu yambidida omavyulonghalo opo ovanadolongo va kale va mona oikwafifo shaashi navo ovanhu ashike ngaashi ovanhu aveshe. Onghee ovanadolongo ova pumbwa okuyambididwa opo va kale ve na oikumbafa ya wana,” Hamunyela ta ti.
Lwopokati opo, Hamunyela okwa ti onghalo yovanhu tava vakele oingangamwifi neengodi dopeke modolongo oya shuna pedu.
Okwa ti ota indile oshiwana opo shi twikile okulongela kumwe novanambelewa hava longo komavyulonghalo mokukondjifa oulingilingili.
fhamalwa@nepc.com.na