Oimaliwa yomutengenekwafaneko yoNgwediva itai lunduluka
ONGWEDIVA - Mayola wodoolopa yaNgwediva Taarah Shalyefu okwa tonga kutya, omutengenekwafaneko wodoolopa yaNgwediva itau lunduluka.
Shalyefu okwa popya kutya omutengenekwafaneko woimailwa yelelodoolopa itau lunduluka shaashi kasha fi oshinakuwanifa shotete. “Ohatu kendabala manga tu tule oinima ei i na oshilonga komesho opo nawa tu lipyakidile noinima ei ishona, ihe na lela oshilonga shakula.” Shalyefu ta ti. Ta weda po vali ta ti: “Opo tu uye po nedilaadilo e li otwa tala yoo komwaalu woimaliwa ei i li po ngeenge otai dulu ngoo okuwanena eemhumbwe edi di na oshilonga manga opo nawa tu lipyakidile noinima ei i na oshilonga shinini.”
Ta ti omutengenekwafaneko welelelo lodoolopa ngee owa kala pomwaalu woimaliwa u li ngaashi u li, eshi otashi mu pe omhito yakula opo a dule okuninga eepoloyeka dakula. Okwa weda po yoo kutya ngeno okwa li oshimaliwa shomutenegenekwafaneko tashi dulu okwedelwa, ngeno otashi dulika yoo elelo doolopa limone po sha shakola.
Shalyefu okwa tumbula yoo kutya oifendela yokongulu itadi wedelwa, otadi kala ashike ngaashi di li. Okwa weda po yoo kutya omeva otaa dulu okuwedelwa ngee Namwater e shi tokola. Edu nalo itali ka wedelwa, otali kala ashike pondado yalo apa la kala li li.
Shalyefu okwa holola enyeme laye kwaavo va li va shaina okulonga oilonga ihapu yomodoolopa yaye, ndele fiyo opaife inava tameka neetendela davo. Odoolopa oi na onghalo ii ya pumbwa okulunduluwa, unene ngee tashi ya peepate onghee ngoo tai pula komesho, voo ovashingi voihauto onghee ngoo tava nyenyeta efimbo alishe. “Ohatu longo noudjuu ngee tashi ya pokulonga novanhu ava twa pa eetendela doku tu longela shaashi ihava mane oilonga yavo pefimbo,” Shalyefu ta tumbula. Okwa kunghilila yoo ovanhu aveshe ovo hava kala va pewa eetendela dokulonga oilonga modoolopa yaye, va mane pefimbo opo ovanhu va dule okulongifa oinima va manguluka.