Pastoli a yaha gumwe sho anuwa a piyaganeke omauvitho
Omulumentu gwomimvo 21 ota mono uuhaku moshipangelo shaShakati sho anuwa a yahwa komusita gwongeleka t yi ithanwa Kakonda mOsoondaha. Omugandji gwomauyelele gopolisi moshitopolwa shaShana Frieda Shikole okwa ti oshiningwanima osha holoka lwopotundi 01h00 momukunda Ashaaga. Otaku hokololwa kutya pastoli ngoka anuwa okwa yaha Fillipus Nanyanga sho anuwa a li ta piyaganeke aalanduli ye ethimbo ye li mongeleka.Okwa lopotwa kutya omusita ngoka anuwa okwa li a yaha Nanyanga kompadhi yokolumoho. Nonando anuwa opolisi okw ali ya thiki pehala mpoka pwa ningilwa oshiningwanima, Nanyanga ina adhika po, okwa monika ashika Omaandaha sho i iyeta koshipangelo ye mwene. Omusita gwongeleka okwa mangwa po, nota holoka nena mompangu. Moshininwanima inaashi faathaana, aakwashigwan yaZambia ye li yatatu oya mangwa po kopolisi moshitopolwa shaZambezi sho ya adhika nuutana wu li une. Sha ikolelela kepeko lyopolisi oshiningwanima osha holoka mehuliloshiweke. Otaku hokololwa kutya uutana mboka wongushu yoshimaliwa N$28 000 owa yakwa komukunda Luhonono momudhingoloko Ngoma. Natango omulumentu gwomimvo 23 okwa mangwa po kopolisi moshitopolwa shOmaheke sho a yaka iimuna yi li itatu e teyi dhipaga. Omulumentu ngoka anuwa okwa li a adhika nonyama , ashike sho a li a pulwa oombapila dhiimuna mbyoka a dhipaga, ka li e dhi na, shoka she mu mangitha. Iimuna oya li ya dhimbululwa kumwene sho a tala kuupapa oshowo kiipa yiimuna. Uulunga wiimuna otau indjipala oshilongo ashihe, opolisi oya kala nokukumagidha oshigwana shi kale aluhe tashi thigi iimuna yawo metonatelo.