HE WHAKAMIHI I NGĀ RINGAPUORO PŪHARU MĀORI

I tauhouanga nei ka kaha kitea te whakarauoratanga o te reo Māori i ngā mahi a te rēhia, i whakarae anō hoki te ahurea Māori i ēnei tokānuku. E whakamānawatia ana rātou mo te kounga o ngā mahi i pahawa i a rātou mo te rāngai puoro o Aotearoa, i te tau ka hori ake nei.

TROY KINGI

Nō te Whiringa-a-Rangi o te tau 2017 ka whakaputaina e te kaiwaiata whakaawe wairua o Kerikeri, e Troy Kingi (Te Arawa, Ngāpuhi), tana kōpaki waiata tuarua Shake That Skinny Ass All The Way to Zygertron. He kōpaki kaiora tēnei e kōmitimiti ana i ngā tāera pakimaero kohuki, mātai hangarau, pōhewanga anō hoki o ngā tau 1970.

I tua atu i te hopuoro e mōhio whānuitia ana a Kingi mo ana mahi whakaari – i āpiti ia i te kaihautū o Ngā Tohu Puoro o Aotearoa 2018, i a Stan Walker, i te kiriata rongonui o te tau 2016 Hunt For The Wilderpeople a Taika Waititi, ā, tae atu ki te kiriata Mt Zion.

ALIEN WEAPONRY

No Waipu a Ethan Trembath rātou ko ngā tungāne ko Lewis, ko Henry de Jong (Ngāti Pikiao, Ngāti Raukawa). Ko rātou te takitoru o te rōpū puoro ngangahu Alien Weaponry, i eke ki te whiringa toa mo tēnei tohu i te tau 2017.

I te tau 2018 i angitū te rōpū nei i te putanga o tā rātou kōpaki waiata tuatahi, o Tū, i te marama o Pipiri. Waihoki me a rātou haerenga ki ngā whetiwara ngangahu kaitā o Ūropi, tae atu ki Wacken Open Air i Tiamani. I eke te waiata Kai Tangata a Alien Weaponry ki te taumata tuatahi o te rārangi waiata whakahirahira ‘Devil’s Dozen’ a Sirius XM (Te Āporo Nui).

KATCHAFIRE

Kua tina te noho o ngā toa whakaihuwaka i te tohu Tui ‘Hoko Waiata Takitahi’ (2003), arā, a Katchafire, ki te toi o ngā rōpū rekereke pūharu i te ao. E whakanuia ana te rōpū nō Kirikiriroa mo te angitū o tā rātou kōpaki waiata tuaono Legacy, i whakarewaina i te tau 2018.

Ko ngā kaipuoro o te kapa ko Logan Bell (Tainui, Ngāti Toa Rangatira, Ngāti Koata, Ngāpuhi), rātou ko Jordan Bell (Tainui, Ngāti Toa Rangatira, Ngāti Koata, Ngāpuhi), ko Grenville Bell (Tainui, Ngāti Toa Rangatira, Ngāti Koata, Ngāpuhi), ko Tere Mateora Ngarua (Ngāti Te Wehi, Tamarua, Mangaia), ko Hani Totorewa (Tainui-Waikato), ko James Ferguson (Ngāti Kahungunu), ko Leon Davey (Rereahu, Ngāti Porou). Koinei tētahi o ngā tino āpārangi i ngā rārangi waiata o te raumati, o ngā kaupapa ngahau huhua anō hoki.

Nei rā te whakamihi ki a koutou e ngā haputa o te ao puoro Māori. Ko te māngari nui ki a koutou