Bergensmann må betale over 25 millionar i erstatning
Lagmannsretten meinte at både tingrettens dom og aktors påstand var for mild. No må 54-åringen betale over 25 millionar i erstatning til tre kvinner.
Ijuli i fjor vart ein 54 år gammal bergensmann dømt for langvarig mishandling av to tidlegare sambuarar, og dessutan den eine kvinna si dotter.
Den gongen vart han dømt til fengsel i to år og åtte månadar, i tillegg til nærare 16 millionar kronar i erstatning til kvinnene.
Mannen anka dommen, og i mars har saka vore oppe på nytt i Gulating lagmannsrett.
Lagmannsretten meinte at straffa han tidlegare hadde fått, var for mild.
No ventar tre år og åtte månadar fengsel for bergensmannen. Det er eit halvt år meir enn det aktor bad om.
Levde under valdsregime. I dommen står det at mannen flytta inn til den fyrste sambuaren og hennar ni år gamle dotter i 2004.
Kvinna har fortald om eit samliv der mannen etter kort tid vart valdeleg og nedpsykande, og at mannen kunne utøvde vald mot henne to til fem gongar i veka.
Dottera skal ha vore vitne til mishandlinga av mora, og vart sjølv utsett for psykisk mishandling av 54-åringen, ifylgje dommen.
Ho fortalde i retten at hennar feil fekk konsekvensar for mora i form av vald.
Vidare manipulerte mannen sambuaren, og fekk stor kontroll i livet hennar, ifylgje dommen. Han skal ha tatt over kontrollen på økonomien hennar då ho vart sjuk. Denne fekk ho ikkje tilbake, og mannen beheldt både pengar frå sal av eigedommar og auka gjelda i hennar namn.
«Gjekk på eggeskal». Ifylgje kvinna vart mannen «sint over alt mogeleg», og ho visste aldri kva som kunne utløyse valden.
Ho har forklart at både ho og dottera «gjekk på eggeskal» for å unngå at mannen skulle bli sint.
Kvinna hadde alltid kontroll på kvar bilnøklane var, og hadde saman med dottera øvd på ei fluktrute dersom det skulle bli nødvendig.
I forklaringa si trakk kvinna fram den verste enkeltepisoden med mannen. Den enda med at han slo kvinna med ein kjøkkenstol i tre til den knakk.
«Ved den anledninga trudde NN at ho skulle døy» står det i dommen.
– Ei stor belastning. – Dette er ei særs alvorleg sak som har hatt store konsekvensar for dei det gjeld. og som har tatt lang tid å få gjennom rettsvesenet, seier bistandsadvokat Kristine Aarre Hånes, som representerer den fyrste sambuaren.
Ho seier det har vore ei stor belastning for kvinna å måtte forklare seg i to rettsrundar.
– At sjølve straffa er auka og at ho er tilkjent rekordhøg erstatning på 18,1 millionar er sjølvsagt tilfredsstillande. Men det viktigaste for min klient har likevel vore å fortelje sanninga om mishandlinga ho og dottera er blitt utsette for gjennom ni år, og å bli trudd på det.
Ho understrekar at økonomisk vald har vore ein vesentleg del av etterforskinga.
– Vi er fornøgde med at dette også er blitt vektlagt av lagmannsretten.
Braut besøksforbod elleve gongar. Den andre sambuaren, som 54-åringen også ein kort periode var gift med, har forklart at han var valdeleg mot henne allereie før dei flytta saman. Ho skal ha endra åtferd og byrja ta på seg all skuld i diskusjonar heilt frå ho møtte mannen. Dei levde i lag i over tre år.
Vidare skal mannen ha utøvd vald mot henne 20–30 gongar, ifylgje henne. Han skal også ha trua med å låse henne ute på altanen fleire gongar, og ved eit høve vart kvinna låst ute ei heil natt om vinteren, ifylgje dommen.
Kvinna trakk i retten fram fleire alvorlege valdsepisodar. Ei av dei hendte på deira sin eitt års bryllaupsdag. Då skal mannen ha «slengt henne vegg i mellom», kasta stolar på henne og vridd handa hennar bak på ryggen.
❝ Dette er ei særs alvorleg sak som har hatt store konsekvensar for dei det gjeld. og som har tatt lang tid å få gjennom rettsvesenet Kristine Aarre Hånes, bistandsadvokat
Kvinna skal ha brekt handa under denne episoden.
Over ein periode på fem månadar i 2021 braut mannen besøksforbodet til kvinna elleve gongar.
Per Magne Kristiansen representerte mannen i saka.
Han peiker på at dommen er eit resultat av eit «utvida bevistilbod og ei skjerpa lovanvendelse» i lagmannsretten.
– Klienten vart elles gjort utførleg kjent med ankerisikoen, og som ein erfaren fjellmann ville sagt det: ligg unna rasutsette område.
Store konsekvensar for dei fornærma. I dommen står det at alle dei tre fornærma i saka seinare har blitt diagnostisert med Posttraumatisk stressliding (PTSD) som fylgje av det dei har blitt utsett for.
Retten framhevar mellom anna at den fyrste sambuaren har slite med «flashbacks» og unngått stadar og personar som minner ho om det ho har blitt utsett for. Ho har også vore i «konstant alarmberedskap», der det skal lite før ho føler seg særs utrygg og trua på livet.
Lagmannsretten har også lagt vekt på korleis mannens handlingar påverka den andre fornærma sambuaren: «NN endra seg frå å vere sprudlande, glad, ressurssterk og trygg til å vere redd og isolere seg. Framleis forlèt ho sjeldan heimen» står det i dommen.
Mannen er i tillegg til fengsel og erstatning også dømt til fem års kontaktforbod mot begge dei to tidlegare sambuarane.