Si nei til Alliansens stand under Arendalsuka
Det er gitt standløyve til ein organisasjon som kallar seg Alliansen. Er dette fordi det skal vere høgt under taket på Arendalsuka at dette skjer?
Rett over sommaren skal eg for fyrste gong delta på Arendalsuka, ein politisk festival på den vakre sørlandskysten. Her skal eg vere med i eit mikrokosmos med resten av organisasjons-Noreg. På nettsida til arrangementet kan ein lese at «Arendalsuka er partipolitisk uavhengig, og har som mål å styrke troen på politikk og politisk debatt. Arendalsuka vil på denne måten bidra til å styrke kraften i vårt levende demokrati.» Det skal med andre ord vere ei mangfaldig og fleirstemt feiring av demokratiet. Sånn må det vere.
Så kjem det fram på nettsida til Arendalsuka at det er gitt standløyve til ein organisasjon som kallar seg Alliansen. Er dette fordi det skal vere høgt under taket på Arendalsuka at dette skjer? Heilt sikkert. Då dei forsøkte å kuppe 1.mai-toget i Bergen i år, fekk dei tydeleg beskjed frå LO om at dei ikkje var velkomne. Eg meiner dei ikkje kan få plass under Arendalsuka heller.
Det er derimot lov å meine at hiphop er «negroid kultur», at jødane tek over landet, at homofili må bli forbode for å «redde fedrelandet» og at islam skal bli forbode i det offentlege rom. Alt dette er kva Alliansen sine medlemmar står for. Folk meiner mange rare ting i dette landet. Men tyder det at det er greitt å gje desse meiningane ein plattform, og dermed legitimere dei? Eg skal forklare kvifor det ikkje dreier seg om å kneble nokon, men kvifor det rett og slett er feil.
For det fyrste representerer denne gruppa eit menneskesyn som står i strid med menneskerettane. Dei diskriminerer på etnisitet, religion og seksuell orientering. Heile premissen deira for å diskutere politikk er at menneskeverdet ikkje gjeld for alle, og at muslimar, jødar og homofile ikkje har rett til å eksistere eller å leve liva sine i fred. Vi kan ikkje akseptere hatretorikk i ytringsfridomens namn. Er ikkje minoritetane sine rettar til å føle seg trygge større enn retten til å spreie hatpropaganda og reinspikka rasisme?
For det andre representerer meiningane deira eit totalitaert gufs frå fortida. Ei enkel misforståing er at nazistane i Tyskland berre var gode til å snakke for seg, og difor klarte å overtyde publikum slik at dei gjekk og røysta på nazipartiet. Så enkelt er det jo ikkje.
Folk blei banka opp om dei var ueinige, og det førte til eit totalitaert regime vi alle veit korleis endte. Ein kan ikkje sei at dei også er ein del av meiningsmangfaldet: Dei er tvert i mot fullstendig ueinige med resten av oss om at det skal eksistere eit mangfald!
Dei har ingenting i ein demokratisk fellesskap å gjere – for dei er fellesskapen noko som må knusast. Er dette eit syn på demokrati Arendalsuka vil gje ein talarstol og plass? Dette handlar ikkje om ytringsfridom. Dette er ikkje å la det vere høgt under taket, men å tillate hatpropaganda. Å gje dei ein plattform, som attpåtil er sponsa av LO og NHO, er å undergrave heile poenget med Arendalsuka. På kva måte er å gjere det utrygt for minoritetar å dyrke demokratiet?