Ga driftsansvaret for Sørlandsbanen til selskapet som har hatt dei mest misnøgde togpassasjerane

SV meiner det er viktig å kunne vedta nasjonalt kva jernbanepolitikk som skal gjelde i Norge. Men dersom Stortinget godtar EU sin Jernbanepakke 4 vil vi ikkje kunne gjere det lenger.

Då kan ikkje Norge vedta noko anna enn EU sine krav til liberalisering, oppdeling og privatisering av jernbanen.

Go Ahead som regjeringa ga driftsansvaret for Sørlandsbanen og Arendalsbanen etter anbodsrunda, er det selskapet som har hatt dei mest misnøgde togpassasjerane i Storbritannia og i tillegg har vore blant dei dyraste. Dersom dei driftar Sørlandsbanen og Arendalsbanen like dårleg vil det garantert bli naudsynt å ta drifta tilbake til det offentlege. Dersom Jernbanepakke 4 blir godtatt vil det berre bli mogleg å reversere dette etter å ha meldt oss ut av EØS.

Med Jernbanepakke 4 tvingar EU all jernbanedrift ut på anbod og over i privat drift. Private aktørar ønsker jo i første rekke å tene pengar, og legg derfor stort press på kostnadskutt og høgare prisar.

EU reviderer også lokførardirektivet og reduserar kravet til opplaering for lokførarar og anna togpersonale. Då blir det dårlegare sikkerheit. I tillegg blir det harmonisering av alt regelverk, og EU-organet ERA (European Union Railway Agency) får ansvaret for å godkjenne alt togmateriell.

Pga. krevande geografi og hardført klima må Norge stille saerskilt strenge sikkerheitskrav. Dette står i motstrid til fri konkurranse. Med Jernbanepakke 4 kan ikkje Norge ha strengare krav til sikkerheit og kvalitet enn det som gjeld i resten av EU/EØS. Sidan Norge ikkje er EU-medlem så både kan og må stortingsfleirtalet seie nei til Jernbanepakke 4 og bruke vetoretten i EØS-avtalen, slik ein samrøystes LO-kongress i 2017 vedtok. Vi i Agder SV står saman med ei samla norsk fagrørsle bak dette kravet.