Legg merke til at Senterpartiet og Arbeidarpartiet framleis er for å dumpe gruveavfall i Repparfjord
Gruvedrifta og sjødeponiet i Repparfjord blei dessverre vedtatt av eit stort fleirtal i Stortinget 2. juni 2016. Det var Arbeidarpartiet, Senterpartiet, Høgre og Framstegspartiet som vedtok dette.
Venstre, Kristeleg folkeparti og SV forsøkte å stoppe vedtaket, men blei grundig stemt ned. Eg vil tru også Miljøpartiet de Grønne ville stemt mot sjødeponiet, men partiet var ofte ikkje i stortingssalen under viktige voteringar. Løyvet blei gitt etter forureiningslova, og kan dessverre ikkje trekkast tilbake på lovleg vis.
Det nyttar ikkje med ny votering i Stortinget, sidan Arbeidarpartiet og Senterpartiet støttar Høgre og Framstegspartiet. Det veit partileiar Audun Lysbakken i SV. Men han er så trygg på at saka ikkje kjem opp igjen, at han likevel krev nettopp ny stortingsbehandling. Lysbakken burde heller skryte av Venstre, som fekk inn i regjeringsplattformen i januar 2018 at det ikkje skal bli gitt fleire utsleppsløyve til sjødeponi. Det bind Høgre og Framstegspartiet. Dette står fast også etter at Kristeleg folkeparti kom med i regjeringa.
Legg merke til at Senterpartiet og Arbeidarpartiet framleis er for å dumpe gruveavfall i Repparfjord. Om Knut Arild Hareide hadde fått Kristeleg folkeparti inn i regjering med Arbeidarpartiet, Senterpartiet og SV, ville SV dessverre fått same nederlaget som Venstre og Kristeleg folkeparti har fått nå.
I fleire stortingsperiodar har SV klart å binde dei rødgrøne til å vente med oljeboring i Lofoten, Vesterålen og Senja med hjelp av Venstre i rødgrøne fleirtalsperiodar. Og SV har gitt tilsvarande hjelp til Venstre når Venstre har vore ein del av fleirtalet. Nå ser det heldigvis ut til at vi har fått eit «evig fleirtal» for vern av Lofoten, Vesterålen og Senja for fisk og mot olje. På same måte bør vi samarbeide framover for å skåne fjordane våre for framtidige sjødeponi av gruveavfall.