– Mii eat sáhte maide dahkat goaskimiid hárrái
Boraspirelávdegoddi 8. guovllu jođiheaddji, John Karlsen, lea čielga diehtu sávza- ja boazodolliide: – Mii eat sáhte maide goaskimiid hárrái dahkat, nu ahte sii fertejit váldit oktavuođa njuolga departemeanttain.
Duorastaga Ávviris besset lohkat go Unjárgga boanddat ja badjeolbmot ledje čoahkkanan ságastallat boraspireváttisvuođa birra ja sii erenomážit vásihit lassáneami goaskinlogus ja sin ealáhusat gillájit dan geažil.
Boanddat ja badjeolbmot mearridedje ahte áigot váldit oktavuođa Boraspirelávdegotti 8. guovlluin, muhto lávdegoddejođiheaddji John Karlsen lohká Ávvirii ahte sis lea dušše váldi daid njealji stuorra boraspires, guovžžas, gumppes, albasis ja geatkkis.
– Boraspirelávdegottis ii leat mihkkige maid sii sáhttet dahkat go lea sáhka goaskimis. Goaskin lea oalát ráfáidahtton ja go galgá báhčit goaskima, de lea fylkkamánnis váldi dan dahkat, dadjá Boraspirelávdegotti 8. guovllu jođiheaddji, John Karlsen.
Departemeanttain ja njuolga ministariin
Boraspirelávdegoddi 8. guovllu jođiheaddji lohká sii leat dusten dán váttisvuođa ja čoahkkinastán
vai gávdnet čovdosa goaskinváttisvuhtii.
– Vaikke mii leat čujuhan dán váttisvuođa juohke áidna čoahkkimis gos mii digaštallat goaskinváttisvuođa, de leat máŋgii dieđihan dán váttisvuođa departementii ja njuolga ministarii. Sáhttá lohkat ahte Boraspirelávdegoddi 8. guovlu lea viggan gávdnat čovdosiid, go mii oaidnit ahte ealáhusat gillájit ja dát lea issoras stuorra váttisvuohta sidjiide, lohká Karlsen.
Evttohan hálddašit goaskima
Lávdegotti jođiheaddji lohká sii leat sádden evttohusa departementii mas sii leat evttohan ahte lea Boraspirelávdegoddi mii hálddaša goaskima.
– Mii leat geahččalan muitalit
ahte eiseválddit fertejit váldit goaskinváttisvuođa duođalaččat ja mii leat sádden evttohusa ahte mii sáhttit leat mielde hálddašit goaskima, muhto nu mo dál lea, de ii leat mis dat váldi, deattuha son.
Stuorra beroštupmi
Jođiheaddji muitala ahte Boraspirelávdegoddi lea viggan oažžut dán ášši riikapolitihkkii ja maiddái sii leat mielde váikkuheamen oažžut johtui prošeavtta goaskima birra.
– Mis lea stuorra beroštupmi áššis vaikke mis ii leat lága mielde mihkkege maid sáhttit dahkat goaskimiin, dadjá son.
Dálkkádat- ja birasdepartementii
Boraspirelávdegoddi ii leat dat
rivttes sadji gosa Unjárgga boanddat ja badjeolbmot galget sáddet reivve, ja son ávžžuha sin sáddet reivve Dálkkádat- ja birasdepartementii, mas lea váldoovddasfástádus.
– Áinnas sáddet midjiide kopiija ja maiddái dieđihit mii geavvá áššis, go mis lea stuorra beroštupmi áššis. Mun liikon bures go sii vuolggahit dán ášši, ja dieđán ahte lea stuorra váttisvuohta ja mun anán árvvus go dan dahket Unjárggas. Muhto sii fertejit njuolga departemeanttain váldit oktavuođa, lohká Boraspirelávdegoddi 8. guovllu jođiheaddji John Karlsen.