Geasseriemut fárrejedje Lujávrri guovddážii dálkki geažil
Mannan lávvordaga čađahedje Lujávrris árbevirolaš sámi geasseriemuid. Dán jagi riemuid lágideddjiid plánaide dálki lea buktán iežas rievdadusaid. Maŋŋit giđa ja čoaska dálkki geažil ávvudeami mearridedje čađahit ieš ássanbáikkis, Lujávrri sámi kulturguovd
Beroškeahttá čoaska dálkkis doaluide bohte guossit ja oassálastit olu báikkiin.
Lujávrri sámi geasseriemut leat deavdán juo 32 jagi ja dat leat šaddan oktan dain stuorámus sámi márkanbeaivin Guoládagas, masa lávejit boahtit ollu guossit miehtá Murmánskka guovllus ja olgoriikkas maid. Guoládaga ja eará sámeguovlluid sápmelaččaide dat riemut leat šaddan maid hui buorren vejolašvuohtan ja muhtimiidda árbevierrun beassat deaivvadit ja ovttastallat. 32 jagi áigi riemuid čađaheami báikin válljejedje báikki jávregáttis golbma kilomehteris Lujávrris eret ja dušše guktii dolle sámeriemuid eará sajis.
Ain olu muohta
Dán jagi Lujávrri árbevirolaš geasseriemuid doaluid – konseartta, valáštallangilvvuid ja eará guoimmuhan- ja hávskkuhandoaluid mearridedje sirdit ieš Lujávrái. Sivvan dasa šattai maŋŋit giđđa.
– Vahkku ovdal doaluid mun, numo dábálaččat, fitnen geahččamin riemuid báikki jávregáttis ja fuomášin, ahte čađahit daid doppe ii menestuva, muitala riemuid lágideddjiid, Lujávrri čearddalaš kulturguovddáža direktevra, Tatjana Sechko.
– Váikko leige oalle liekkas ja Lujávrris lea juo suddan sihke muohta ja jiekŋa jogas, de jávregáttis ain lei váikke man olu muohta ja eanabihtáin, gos dat lea suddan, lei hui njuoskkas. Gieldda ráđđehusas midjiide leat fállan sirdit doaluid beaivvi boahtte vahkkui, muhto mis ii lean dakkár vejolašvuohta. Kulturprográmma eanaš oassálastit miehtá Murmánskka guovllus barget kul- turásahusain ja go dálvekulturáigodat nohká, de olugat vulget lupmui ja čohkket daid min doaluide šaddá veadjemeahttumin iige dálkkinoahkku leta illudan, čilge riemuid lágideddjiid direktevra Tatjana Sechko.
Galggašedje gohčodit čakčariepmun
Kulturguovddáža olggobeallái ledje ceggen ivnnát lávuid, ordnen ja čiŋahan lávddi saji konseartaprográmma várás, masa leat oassálastán lávlut ja dánsejeaddjit Murmánskka guovllu moatti gávpogis eret. Duojáriidda ja eará gávpeolbmuide ledje ordnejuvvon vuovdinsajit, gávpeolbmot bukte máŋggalágan suohttasiid mánáide. Beroškeahttá čoaska dálkkis 5 – 7 lieggagráda, riemuide bohte oalle olu guossit, sihke Lujávrri ássit ja olbmot eará gávpogiin Murmánskkas, Olenegorskkas, Severomorskkas ja nu ain. Giđđabiktasiiguin badjelis olugat leaikkastalle ahte dálvvi maŋŋá dallánaga lea boahtán čakča ja dán jagi geasseriemuid galggašedje gohččodit čakčariepmun. Sidjiide, geat ledje veahá galbmon, lei vejolaš áibbas nuvttá máistit liegga liema, oastit bassojuvvon bierggu dahje dánsut veaháš.
Nissonspábbačiekčamiid haga eat birge
Riemuid valáštallit fas eai olu beroštan čoaskimis, erenoamážit nieiddat, geat leat gilvvohallan spábbačiekčamis. Vaikke Lujávrris ii leat jeaggi, de biehttalit riemuid dan gilvvus, mii dábálaččat geasuha olu gehččiid, lágideaddjit eai duostan.
– Min geasseriemut dan valáštallansuorggi haga eai leat šat min riemut, čaibmá Tatjana Sechko
Čiekčanbiktasat maid galget leat riemuid árbevieru mielde – čiekčat čuvllaiguin badjelis ja spábba galgá leat dušše náhkis ráhkaduvvon. Spábbačiekčangilvvuid golbma nieidajoavkku čađahedje Lujávrri ámmátskuvlla olggobealde (nuppe bealde geainnu kulturguovddážis).
Eai vuoitán
Dađi bahábut Lujávrri nieiddaid joavku ii vuoitán, muhto sii eai galbmonge. Vuosttaš saji válde fas gilvaleaddjit ránnjábáikkis eret – Revddas. Dat ii leat imaš, go ieža dat nieiddat čaibme ja muitaledje, ahte sii lávejit moadde jagi juo maŋŋálagaid deaivvadit sámi geasseriemuin ja ovttas oassálastit gilvvuide nu, ahte sis lea juo hábmejuvvon oalle virggálaš spábbačiekčanjoavku ja sii leat duhtavaččat dainna.
Sihke lágideddjiid ja gussiid mielas dan jagáš geasseriemut muđuid leat mannan dohkálaččat.
– Dieđusge mii diehtit ja áddet bures, ahte sámi geasseriemut viehka olu masset iežaset erenoamášvuođa, go eai čađahuvvojit iežaset «riegádanbáikkis», ja doaivvun boahtte jagi geassi ii áiggo šat imaštahttit min dakkár erenoamáš dálkkiin, cealká kulturguovddáža direktevra.