Utøya nuorat deaivvadit fas
NORGA: Ovcci nuora geat besse heakkas Utøyas deaivvadedje vihtta jagi áigi katastrofaekspeartan Mánáidáittardeaddji ovddas. Das bođii rapporta «Katastrofaekspearttat- viidásit eallit Utøya maŋŋil». Dál sii fas deaivvadit.
Nuorat leat ráhkadan čuovvolanrapportta, ovttas Nuortta regiovnna veahkaválddálašvuođa, traumáhtalaš streassa ja iešsorbmeneastadan resursaguovddažiin (RVTS Øst). Dan dieđiha RVTS Øst preassadieđáhusas. Dan rapporttas čilgejit makkár veahki leat ožžon, ja movt ieža ja sin eallin lea rievdan. Vaikko dál manná buorebut singuin, de leat olu nuorat várrogeabbo go hupmet Utøya birra. Muhtumat leat šaddan gullat negatiivvalaš kommentáraid, ja lea čuoččuhuvvon ahte sii geavahit Utøya ággan feara masá. Dat lea dagahan ahte oallugiidda lea leamaš váttis ohcat veahki.
– «Lihkkospeallu» makkár čuovvuleami ožžot
Vuosttaš rapporttas čujuhedje ahte leat stuora erohusat makkár veahki nuorat leat ožžon maŋŋil. Ođđa rapporttas leat gohčodan čuovvoleami «lihkkospeallun».
– Árvvoštallamat čájehit ahte dađi bahábut leat stuora erohusat suohkanis suohkanii. Muhtun gillájeaddjit leat vásihan ahte fálaldat ii bistán go oanehaš, eará rapporttat fas čájehit ahte leat ožžon buori veahki, lohká Nils Petter Reinholdt RVTS Østas. Nuoraid jurdagat čuovvoleami birra leat áigeguovdilat vai buorida sin fálaldaga geat boahtteáiggis vásihit heahtediliid ja katastrofaid.