Anti oažžu nu go háliidii
Marit Kirsten Anti, Bargiidbellodat, oaččui juste nu go háliidii, go dagai iežas mearrádusa Fefo stivrras dálvet. Son lei oainnat áidna sámediggeáirras Fefo stivrras gii jienastii ahte Fefo galgá guoddalit Unjárgga-duomu. Dál lea Norgga Alimusriekti mearridan ahte sii váldet Unjárgga-duomu ođđa meannudeapmái. Dan čállá Ságat áviisa.
Váide ášši
Unjárgga gilisearvi lea gáibidan Finnmárkokommišuvnna bokte hálddašanrievtti guvlui gos Unjárgga ássiid leat agibeaivvi ávkkástallan meahci buriid. Finnmárkokommišuvdna ii nagodan oaidnit sis ahte leat sierrarievttit guvlui. Unjárgga gilisearvi loktii ášši Meahcceduopmostullui, gos duopmu bođii ahte sii ožžot hálddašanrievtti guvlui masa ledje gáibidan.
Dehálaš čuvgehit ášši
Fefo direktevra, Jan Olli, ávžžuhii Fefo stivr- ra váidit ášši Alimusriektái, ja nu mearridii maid Fefo stivrra eanetlohku, oktan Bargiidbellodaga Fefo stivraáirasiin, Marit Kirsten Antiin. Son dajai ahte lea dehálaš ahte ášši guorahallo nu dárkilit go oba sáhttá ge, ja lea dehálaš čuvgehit ášši Alimusrievttis.
Guokte eará Sámedikki áirasa, Mathis Nilsen Eira (NSR) ja Hartvik Hansen (Árja), jienasteigga vuostá guoddalit ášši Alimusriektái.
nilsjohan@avvir.no