Earenoamáš guossi dán jagáš Riddu Riđđui
Suoidnemánu 13. beaivvi álgá dán jagáš Riddu Riđđu festivála Olmmáivákkis. Dán jagi leat festivála lágideaddjit bovden earenoamáš guossi gii rahpá festivála.
Boahtá fatnasiin
Norgga dronnet Sonja lea dat gii dán jagi galgá rahpat festivála. Gili olbmot leat váldime su vuostá go boahtá fatnasiin Løkvoll káijai.
Manná Riddu Siidii
Festiválajođiheaddji Karoline Trollvik sávvá dronnegii bures boahtima go olle festiválabáikái. De son manná viidáset Riddu Siidii, gos leat olu eamiálbmotviesut ja eamiálbmogat geat leat bovden gehččiid iežaset ruovttuide.
– Dán jagáš prográmma galgá áŋgiruššat ja illudit. Mii áigut geahččalit doalahit Riddu Riđu deháleamos deaivvadanbáikin boahttevaš eamiálbmotjienaide ja ahte dáppe oahpásnuvvet ja ovttasbargagohtet, dadjá Trollvik.
Deaivvada eamiálbmogiiguin
Riddu Riđđu lea eamiálbmotfes- tivála, ja lea danne dehálaš oassi maid dronnet galgá beassat oaidnit. Son beassá deaivvadit Berit Alette Miennain ja Gerd Mikalseniin olggobealde mearrasámi gámme, gos guossohit gáfe, goikeguoli, luođi ja beassá gullat eambbo mearrasápmelaččaid birra. Dasa lassin beassá oaidnit Alaska eamiálbmogiid maid, gos beassá gullat sin birra, lávluma ja dánsuma.
Oažžu skeaŋkka
Festiválajođiheaddji Karoline Trollvik ja stivrajođiheaddji Christina Henriksen geigeba dronnegii skeaŋkka su 80-jagi beaivvi oktavuođas. Dasto rahppo festivála dronnega bokte, ovdal go son fas guođđá festiválaguovllu.
Dán jagi leat Riddu Riđu lágideaddjit bovden earenoamáš guossi rahpat dán jagáš festivála Olmmáivákkis. Olles gilli lea bovdejuvvon vuostái váldit guossi go olle Olmmáivággái fatnasiin.