ILUS go beassá bargat
Báhtareaddji Abdulhamid, gii ássá Kárášjogas, lea ilus go beassá geahččalit bargoeallima. Son lea okta njealljásis geat dál leat bargohárjehallamis Kapros.
Abdulhamid lea okta dain báhtareddjiin. Son boahtá Syrias ja lea dál njeallje beaivvi bargan Kapros. Ovdal go álggii Kapros bargat de son ii lean bargan beannot jahkái. Ruovttubaikis son barggai mekanihkarin, vujii guorbmebiillain ja gilvvagárddis.
Kapros son bargá olgoossodagas. Doppe son beassá bargat earet eará sihkkeldivohagas ja gilvvagárddis.
– Lea hui buorre bargat dáppe, ja dáppe leat hui siivos mielbargit, lohká Abdulhamid. Abdulhamid lohká iežas loaktit hui bures ođđa bargosajis.
Ođđa ovtttasbargu
Geassemánu 20. beaivvi álggii Kapros ja Kárášjoga Báhtareddjiidbálvalusas ođđa ovttasbargu. Dat ovttasbargu galgá veahkehit Kárášjoga ođđa ássiid boahtit bargui, oahpásnuvvat ođđa olbmuiguin ja Kárášjoga suohkaniin.
Lunddolaš ovttasbargu
Kapro beaivválaš jođiheaddji, Olav Verstad, muitala dat ovttasbargu bođii hui lunddolaččat, juste fal dan dihte go sii leat čađat veahkehan olbmuid iešguđet diliin boahtit fas bargoeallimii ja sin višuvdna leage «ovdáneapmi bargguid bokte».
Verstad evttohii ovttasbarggu sátnejođiheaddjái, ráđđeolbmái ja Kapro stivrii. Sii ledje buohkat ovttaoaivilis addit báhtareddjiide dan vejolašvuođa ja álggahit ovttasbarggu.
Njeallje ođđa bargi
Dál leat njeallje báhtareaddji álgán bargat Kapros. Sii barget iešguđet ossodagain. Basahagas, tekstiilaossodagas ja snihkken- ja olgobargoossodagas. Dain ossodagain báhtareaddjit besset earet eará snihkket, čuohppat suinniid, bargat viessohoaiddára bargguid, gođđit ja goarrut.
Dehálaš oahppat giela
Verstad mielas lea dehálaš ahte sin ođđa bargit ohppet giela ja dan dihte leat háddjen dan njeallje báhtareaddji iešguđet ossodagaide. Dainna lágiin sii šaddet gullat ja hupmat eambbo dárogiela.
– Leat veahá giellaváttisvuođat. Báhtareddjiin lea bággu máhttit dan mađe dárogiela ahte singuin sáhttá gulahallat. Eanas báhtareaddjit máhttet unnit eŋgelasgiela go dárogiela, muhto manná aŋkke hui bures.
Kárášjoga Báhtareddjiidbálvalus dat árvvoštallá máhttet go báh- tareaddjit doarvái dárogiela álgit bargat Kapros.
Mannan buorebut go doaivvui!
– Jáhkken juo ovdal ahte dat ođđa ovttasbargu šaddá hui buorre ja dál go lea álgán, de dieđán dat manná bures, muitala Olav Verstad.
Verstad maid muitala dat vuosttaš vahkku lea mannan hui bures. Ođđa bargit ohppet jođánit ja son doaivu Kapro lea hui buorre sidjiide. Sis leat mánát, skuvla, ja sii maid dárbbašit boahtit sisa Kárášjoga servodahkii.