Gávcci čiekči Guovdageainnus
Gávcci Guovdageainnu čiekči leat beassan mielde Sápmi joavkkuide, ja leat gergosat čiekčat spáppa Bihttánis dán geasi.
Moatti beaivve geahčen álget spábbačiekčanriemut Ruoŧas gosa earret eará FA Sápmi lea dieđihan joavkkuid. Håkan Kuorak lea čohkken čikčiid miehtá sámi, sihke nieida- ja bárdnejovkui.
Gávcci čiekči Guovdageainnus
Hárjeheaddji ja gulahallanolmmoš Guovdageainnu valáštallansearvvis, Inga J. Eira fárrolaga nuppiin hárjeheddjiin, leaba nomineren čikčiid geat galggašii beassat jovkui. Nomine- remiid vuođul lea Håkan Kuorak válljen geat besset jovkui. – Buohkat geaid moai letne nomineren, leat beassan mielde jovkui, muitala Eira.
FA Sámi presideantta Håkan Kuorak lea geahččalan válljet daid buoremus čikčiid geaid son diehtá.
– FA Sápmi lea lágidan hárjehallandeaivvademiid nuoraide, gos leat beassan čájehit maid máhttet. Dan vuođul leat fas mii válljen čikčiid geaid mii doaivut birget bures, dadjá Kuorak.
Dovddadit
FA Sápmi lea lágidan deaivvademiid nuoraide gos leat beassan oahpásnuvvat ja hárjehallat fárrolaga. Eira ii danne oainne dán váttisvuohtan go galget čiekčat fárrolaga.
– Jáhkán eatnasat juo dovddadit, ja leat veahá hárjehallan fárrolaga. Nu ahte in doaivvo šaddat hástalussan go galget ovtta joavkkus čiekčat Ruoŧas. Aŋkke sávan ahte mii nagodit oažžut ovtta hárjehallama fárrolaga Ruoŧas ovdal čiekčamiid, dadjá son.
Illuda
Okta čikčiin gii beassá vuolgit, lea 16-jahkásaš Anne Line Guttorm. Ii loga leamaš nu olu hupmu dán birra, muhto lei árvidan ahte son beassá vuolgit.
– Lean leamaš FA Sámi deaivvadeamis ovdal, gos sihke oahpásnuvven ođđa olbmuiguin ja ohppen olu čeahpes hárjeheddjiin. Lea hui somá go bessen vuolgit, ja illudan, jáhkán šaddat hui somán, dadjá Guttorm.
Eambbo čiekčit šiljus oktanaga
Guovdageainnu nieiddat čikčet dábálaččat čižeš spábba-
čiekčama ráidočiekčamiin, ja besset ge geahččalit juoga ođđasa Ruoŧas, gos galget 11 čiekči šiljus. Vaikko eanaš nieiddat eai leat ovdal geahččalan dan, de Eira ii doaivvo dán šaddat hástalussan.
– Erohus ii leat nu stuoris, dušše veahá eambbo čiekčit šiljus. Lean geahččalan čilget nieiddaide ahte fertejit geahččalit speallat iežaset lagamus čikčiide, eai ge jurddašit nu stuorrát. In jáhke dán šaddat hástalussan, doaivvun mannat bures.
Anne Line Guttorm duođašta ahte son ii bala čiekčamis vaikko galget eambbo čiekčit šiljus, go son lea geahččalan dan ovdal.
– Mun liikon čiekčat go leat 11 čiekči šiljus, nu ahte in bala das. Vaikko lea veahá eará go dat masa leat hárjánan ruovttus, de jáhkán dan mannat hui bures, dadjá son.
Buorre doaivva
Guttorm diehtá sullii geat su joavkkus bohtet leat, ja sus lea buorre doaivva ahte sii galget lihkostuvvat bures čiekčamiin.
– Mun sihke sávan ja doaivvun ahte birget bures. Mihttu lea dieđusge beassat nu guhkás go vejolaš čiekčamiin, dadjá son.
– Buot suohttaseamos gal šaddá oahpásnuvvat eará nuoraiguin, ja dieđusge čiekčat spáppa ođđa olbmuiguin eará sajis, danne vuolggán ge dohko, loahpaha čiekči Anne Line Guttrom.