Nuorat diliheamet
Jus geahččá Nsr-listtuid 2017 sámediggeválgii, de leat Ávjováris ja Davviguovllus eanas lahka 50-jahkásaččat, badjel 50-jahkásaččat, muhtumat vel lahka 70-jahkásaččat, dain listtuin. Jus geahčesta NSR/SÁB listtu Nuortaguovllu válgabiirres, de doppe lea de áibbas eará dilli.
Nuorraolbmot
Njeallje njunušolbmo leat buohkat nuorabut go 35-jahkásaččat, ja njunuš lea 27-jahkásaš. Okta sis, Jovna Vars Smuk, lea 34-jahkásaš, ja lea nuppi sajis NSR/SÁB listtus Nuortaguovllus. Sus ii leat čielga vástádus manin nu lea šaddan.
– Lea válgalávdegoddi mii lea nammadan dan listtu, ja nammadančoahkkin dohkkehii listtu nu go lei evttohuvvon. Fertet measta sis jearrat dan, lohká Vars Smuk.
NSR/SÁB Davviguovllu válgabiirelistu lea earálágan go eará listtut, go doppe leat njunnošis nuorra olbmot.
Diliheamet
Vaikke leat dan mađe olu boaranat Sámedikki jienastuslogus, de ii bala Vars Smuk ahte ii oaččo jienaid. Sus lea gal jurdda manin nuorat eai leat jienastuslogus, ja maid eai searvva listtonjunnošii.
– Dán áigge leat nuorat hui diliheamet. Sii leat oahpu váldime, ja muđui leat iežaset diŋggat maid barget, eai ge čuovo mielde politihkas nu dárkilit, lohká son.
Ii ge son loga alddis dasa nu čilgehusa manin leat eanas boaranat Sámedikki jienastuslogus.