Boahtte vahkku sirdigohtet ATOMABÁZAHUSAID
Disdaga vuolgá vuosttaš fanas atomabázahusaiguin maid leat viežžan báikkis mii gohčoduvvo máilmmi vearrámus atomabázahusbáikin.
Báiki lea Andrejevbukta Ruošša bealde, mii lea vihtta miilla nuorttabealde Girkonjárgga. Dohko lea Ruošša máŋgalogi jagi vurken rádioaktiiva atomabázahusaid ja jagiid mielde leat gártan nu olu ahte dat dagahivččii seamma meari go 5 000 Hiroshima-bombba. Dán čállá NRK Finnmárku.
1960-jagiid álggus ja 1980-jagiid rádjái lea Ruošša dohko dolvon atomabázahusaid.
Heajos stánddas
Dál álget sirdit boares rádioaktiiva atomabázahusaid fatnasiin Murmánskii ja das viidáseappot Mayak báikái LulliUrálas Ruoššaš gos de várrogasat biđgejit bázahusaid. Lea čadnon stuora eahpesihkarvuohta mo sirdin lihkostuvvo.
– Mii ballat ahte dat táŋkkat maid siste bázahusat leat sáhttet leat ruston ja čáhci beassan daid sisa. Go de galget loktet táŋkkaid, de sáhttá dain vuođđu luoitit ja dat sáhttá dagahit ahte rádioaktiiva bázahusat suđđet. Das sáhttet leat stuora váikkuhusat, ii dušše báikkálaččat, muhto maiddái rádjeguovlluide Finnmárkkus, dadjá Norgga olgoriikaministtar Børge Brende NRK Finnmárkui.
Juolludan ruđa čorgemii
Norga lea guhkit áigge juolludan ruđa Andrejevbukta čorgenbargguide. Eanas ruhta lea mannan sihkkarastit guovllu, hukset geainnu guvlui ja káijaid mearragáddái. NRK Finnmárkku dieđuid mielde lea Norga juolludan birrasii 270 miljovnna čorgenbargguide. Maiddái eará nu gohčoduvvon G7-riikkat, nugo Stuora Británnia, USA, Frankriika, Japána, Duiska ja Italia leat stuora supmiid juolludan bargguide.