«Historjá Sámis»
Sámi historjá lea ilbmamin dokumentáran. Stockholmmas Ruoŧas ledje boahtán Várjjagii báddet boarráseamos sámi kulturmuittu mii lea gávdnon.
Ruoŧa Tv-buvttadanfitnodat lea fitnan Unjárggas báddemin oasi sámi historjjás ođđa dokumentáraráidui. Dokumentára «Historjá Sámis» lea sámi historjjá birra ja dokumentára buvttadeaddjit leat leamaš miehtá Sámi báddemin sámi historjjá, sihke Norggas, Suomas, Ruoŧas ja Ruoššas. Dokumentára lea golbma oasážis ja juohke oasáš bistá 60 minuhta. Dokumentára galgá čájehuvvot YLE:S, SVT:S ja NRK:S.
– Lea sámiid historjjá dokumentára ja dát galgá čájehuvvot juovllaid áigge Ruoŧas, muhto čájehuvvo maiddái YLE:S ja NRK:S. Dát lea dat stuorámus buvttadeapmi sámi historjá birra mii goassige lea dahkkon TV hámis, dadjá dokumentára rešissevra, Magnus Sjöström.
Várjavuonas báddemin
Dokumentárabuvttadeaddjit leat bádden oasážiid dokumentáras birra Várjavuonas.
– Dáppe Ceavccageađggis gávdnojit dat boarráseamos sámi bázahusat, čuohtejagi jagi ovdal go Jesus Kristus riegádii. Mii leat bádden bivdoscenaid dokumentárii ja áigut báddet hávdádeami mo dolin barge, dadjá rešissevra Sjöström.
Govvidan historjjálaš dáhpáhusaid
Dokumentára buvttadeaddjit leat jearahallan arkeologaid ja historihkkáriid ráhkadettiin dokumentára. Sii leat maiddái govvidan historjjálaš dáhpáhusaid main sii leat geavahan neavttáriid. Unjárgalaš Jovna Vars Smuk lea leamaš mielde báddemiin ja su mielas lea buorre go ráhkaduvvo dokumentára sámi historjjás.
– Lea hui somá gullat ahte dáppe Unjárggas lea dat boarráseamos sámi kulturmuittut ja dološ ávdnasat. Lean beassan geahččalit báhčit dološlágan dávggiin, mii lei somá, muhto maiddái veaháš váttis, muitala Smuk.
Nuorra neavttárat
Celine Nilsen (8) ja Niklas Smuk (9) mielas lei gelddolaš leat mielde go báddejit dokumentára. Soai beasaiga oahpásmuvvat mo dolin hávdádedje olbmo dán guovllus, dalle barde geđggiid badjel.
– Lea somá leat mielde ja lea gelddolaš oaidnit maid galggan bargat, dadjá Niklas Smuk. Neavttárat ledje gárvodan dološláhkái, veaháš čoaskkis, lohkaba leat nuorra neavttárguovttis.
– Lei somá leat mielde, in leat goassige leamaš mielde go filbmejit, lohká Celine Nilsen.
silje@avvir.no