Dál sáhtát duháhiid vuoitit dákkáraččain
Ávvir lágida dál oaggungilvvuid mas leat vuoittut sihke mánáide ja rávisolbmuide. Searvva don ge!
Ávvir lágida dán geasi oaggungilvvuid. Gilvu álgá vuossárgga geassemánu 26. beaivvi ja bistá gitta suoidnemánu 31. beaivái.
Searvva ná:
Dán jagi leat veahá rievdadan njuolggadusaid, muhto searvat gal lea seamma álki go diibmá ge. Lasit gova avvir.no siiddus, ja deavdde buot dieđuid guoli ja oaggu birra.
Golbma luohká
Gilvvus leat golbma luohká; Luossagonagas dahje -dronnet, Buot guolit ja Guollelihkku. Luossagonagasgilvui sáhttá searvat dušše luosaiguin, muhto sáhtát oggon vaikke gos, beare leat vuokkain goddán dan.
Son guhte dán vahkku lea dieđihan losimus guoli, oažžu gaibagahpira mas čuožžu Ávvir Luossagonagas, dahje -dronnet jus lea nissonolmmoš.
Luossa ferte leat goddon 2017 luossabivdoáigodagas, muhto ii dárbbaš dan vahkos goddon go dieđihat luosa.
Gilvu loahpahuvvo suoidnemánu 31. beaivvi diibmu 24.00.
Buohkat geat servet leat mielde vuorbádeamis mas sáhttá vuoitit 5000 ruvnno ovddas skeaŋkakoartta.
Sáivaguollegilvu
Dán jagi leat mearridan bidjat sierra luohká sidjiide geat leat gaskkal 13 ja 100 jagi boarrásat. Dán gilvui sáhttá searvat vaikke sáivaguliiguin, man oažžu leat goddán vaikke gos ja vaikke mo. Áidna eaktu lea ahte lea dán geasi goddon ja ahte dieđihuvvo midjiide ovdal suoidnemánu 31. beaivvi, diibmu 24.00.
Son guhte dán gilvvus goddá losimus čuovžža vuoitá 2500 ruvnno ovddas skeaŋkakoartta man ISAN skohterfitnodat sponse.
Son guhte goddá losimus rávddu, vuoitá maid 2500 ruvnno ovddas skeaŋkakoartta man ISAN skohterfitnodat sponse.
Guollelihkku
Mánáid gilvvu leat ges gohčodan Guollelihkkun.
Dása sáhttet gaskal 2- ja 12-jagi mánát searvat, vaikke makkár guliin maid mánná ieš lea goddán vuokkain.
Vahkkosaččat vuorbádat vuoiti, guhte oažžu oaggunstákku Finnmárkkuopmodagas Fefos.
Dasa lassin vuoitá dat mánná guhte losimus guoli lea dieđihan, 1500 ruvnno árvosaš skeaŋkakoartta.
Gilvui searvvat avvir.no siiddus ja doppe gávnnat ollislaš njuolggadusaid. Njuolggádusat ja eambbo dieđut gávdnojit maid dán aviissas 10. siiddus.
Searvva fal don ge, soaitá dus guollelihkku ja šattat gonagassan dahje dronnegin!