Drošševuoddji galgá sáhttit gádjut heakka
…lei Mikkola jurdda go álggii bargat áššiin
Golbma mánu dás ovdal álggii Bjørn Erik Mikkola bargat ahte buot droššebiillain Finnmárkkus galgá leat váibmomašiidna. Dál leat juo vuosttaš droššebiillain mašiinnat sajis.
Dan rájes Norgga droššebiilasearvvi stivrrajođiheaddji Finnmárkkus, Bjørn Erik Mikkola bargagođii váibmomašiinnaid droššebiillaide, lea ášši ovdánan nu jođánit ahte vuosttaš droššiin leat juo váibmomašiinnat.
Gádjut heakka
Golbma mánu áigi álggii Mikkola bargat ahte buot droššiin Finnmárkkus galgá váibmomašiidna. Dán rádjái leat ožžon gávcci suohkana fárrui, ja doaivumis oažžut vel eambbosiid mielde dađistaga.
– Olmmoš ii goasse dieđe goas sáhttá dárbbašit váibmomašiinna, danne lea mu mielas hui dehálaš ahte buot droššiin galgá leat dakkár. Drošševuoddji galgá sáhttit gádjut heakka jus dakkár dáhpáhus čuožžila, čilge Mikkola.
– Dán rádjái leat gávcci suohkana mielde, muhto doaivvun ahte eambbosat čuovvolit oanehis áiggis. Lean bargan dáinna áššiin dušše golbma mánu, nu ahte lea mannan hui jođánit dan rájes go álgen. Erenoamáš jođánit, nu ahte leat ain olu suohkanat geain eat leat vel geargan digaštallat dan birra.
30 váibmomašiinna
Girkonjárgga droššet leat okta dain vuosttaš droššiin maidda biddjo váibmomašiidna Norggas, ja dán rádjái leat juo 30 váibmomašiinna biddjon biillaide. – Dieđán dušše moadde drošše main leat váibmomašiinnat dáppe Norggas, eai leat galle. Dál leat mis juo 30 váibmomašiinna, mat bohte mannan vahku. Mus lea buorre doaivva ahte galget leat 50 mánu geahčen. Ášši lea ovdánan jođánit, ja doaivvun ain mannat jođánit, dadjá Mikkola.
Dehálaš sutnje
Váibmomašiidna lea juoga maid ii goasse dieđe gos ja goas dan dárbbaša. Drošše lea luottaid alde, ja lea álki fidnet sin ságaide, mii dagaha ahte Mikkola mielas lea drošše buorre vejolašvuohta.
Mikkola muitala maid ahte iežas eamit buohcá váimmuin, mii lea dagahan ovdánahttit dán ášši vel deháleabbon sutnje.
– LHL:I lea stuorra oassi gudnis go dát ášši duođas lea ovdánan, go sii leat leamaš searvi geaiguin leat ovttasbargan čađahit dan. Muhto mu eamit lea sivvan manne oba álgen ge bargat dáinna áššiin, go son buohcá váimmuin, dadjá son.
Oahpahallat
Jurdda lea ahte buot drošševuoddjit galget oahppat geavahit váibmomašiinnaid.
– Jurdda lea ahte ambulánsabargit galget oahpahit drošševuddjiid geavahit dán váibmomašiinna. Nu olusat go vejolaš galggašedje máhttit dainna, áinnas buohkat. Mii ávžžuhit dieđusge buot drošševuddjiid oahppat dáinna mašiinnain, muhto dieđusge eat sáhte bágget olbmuid jus eai áiggo, čilge Mikkola.
Finnmárku ovddimuš
Mikkola lea ferten álggahit dán barggu juoga sajis ovddemus, ja dat šattai Finnmárku. Álggos oažžut buot droššiide Finnmárkkus dáid mašiinnaid ovdal bargagoahtá riikaviidosaččat maid.
– Juoga sajis fertejin álgit, ja de lei čielga mihttu Finnmárku. Finnmárkkus láve leahttu go vuos álgá bargat juoga man vuostá, ja lávet dábálaččat lihkostuvvat. Jurdda livčče dieđus oažžut dán fálaldaga riikaviidosaččat maid, muhto ferte oaidnit maid olaha, loahpaha Bjørn Erik Mikkola.