Boazodoallu Alaskas, geasseskuvla ja luohtearkiiva Riddu Riđus
Festiválajođiheaddji Karoline Trollvik iluin almmuha dán jagáš festivála prográmma Romssa Universitehtas. Sii ovttasbarget Riddu Riđđu festiválain ja geavahit dan praksisja dutkanarenan.
Studeanttat ja bargit galget veahkkin lágidit guokte miellagiddevaš seminára, luohtearkiivva lávus ja maiddái lágidit geasseskuvlla.
Vuosttaš seminára fáddá lea boazodoallu Alaskas ja dat heive ge hui bures dan dihte go dán jagáš Riddu guossit leat Alaskalaččat. – Seminára šaddá hui earenoamáš arena ságastallat fearániid ja vásáhusaid birra, ja čalmmustahttit manne ásahuvvui boazodoallu Alaskai, muitala Torjer A. Olsen gii galgá láidestit seminára.
Nuppi seminára, «Kulturipmárdus čoavddus buoret dearvvašvuođabálvalusaide árktalaš guovlluin», galget buohccidivššárstudeanttat lágidit. Studeanttat bohtet eret Kanadas, Ruonáeatnamis, Ruoššas, Islánddas ja Norggas. Ulbmil seminárain lea čájehit movt buohccidivššár sáhttá buoridit dearvvašvuođabálvalusaid go lea máhttu kultuvrras ja árbevieruin. Romssa Universitehta studeanttat galget maid lágidit geasseskuvlla árktalaš studeanttaide.
Romssa Musea - universitehtamusea galgá dán jagi maid lágidit «luohtelávu». Luohtelávus beassá guldalit dološ luđiid, mat leat sin arkiivvas váldon. Soaittát vaikko beassat gullat oahpes luđiid.
Riddu Riđđu lea suoidnemánu 12.-16. beivviid Olmmáivákkis, Gáivuona suohkanis.