Lullisámenieida Vaino ožžon niehkobarggu
Dan čavčča álgá Vaino bargat NRK tv-ráiddus Norge Rundt sáddagis, ja dasa son gal nu illuda.
Mannan disdaga oaččui Vaino Rensberg somás gaskkaboddosaš bargofálaldaga. Su hoavda NRK Sámis siđai su boahtit iežas kantuvrii Kárášjogas ja jearai Vainos movt livčče fárret Bergenii. Dasa son gal dieđusge vástidii jua, ja dál son beassá álgit bargat NRK tv-ráiddus Norge Rundt, mii oidno juohke bearjadaga diibmu 19:30.
Filmmažin oaččui barggu
Bargoohcan álggii jearahallamiin ja čuovvolii filmmain. Son lei juste barggus Bådådjos go hástaluvvui iežas filbmet. Son muitala ahte lei veahá ártet iežas mielas go barggus váccaša ja filbme, muhto lasihastá vel ahte dat dáidá ge leamašan buorre bargohárjehallan.
Su suorpmas šattai fáddán
Vaino galggai iežas filbmet go humai juoga man birra, mii mearkkaša hui olu sutnje. Son válljii hupmat iežas suorbmasa birra maid lea oastán Johkamohkemárkaniin 2013:s.
– Mus lea dat suorpmas leamašan mielde feara gos ja dasa leat čadnon olu somás ja fiinna muittut, muitala Vaino.
Illuda lullisámegiela buktit TV:I
– Mun illudan mátkkoštit, deaivat ođđa olbmuid, oaidnit maid sii bargat. Muhto mun illudan earenomážit čalmmustuhttit lullisámi ja lullisámegiela, muitala Vaino Rensberg. Su mielas gullo beare unnán lullisámegiella TV:S, ja dan dihte áigu ge son hupmat eanas lullisámegiela tv-ráiddus, earret go dalle go lea jearahallame, dalle son gal ferte dárustit.
– Logan nu movt Pippi
– Orro gal maid veahá issoras álgit Tv-ráidojođiheaddjin, juste fal dan dihte go lea dakkár bargu maid mun in leat ovdal bargan. Muhto mun logan nu movt Pippi Langstrømpe: – Dan mun in leat goasse bargan, nu ahte dan mun gal hui sihkkarit máhtán!, dadjala Vaino.