Ođđa symfoniijalaš-metal musihkkavideo sámegillii
Musihkkár ja produseanta Treven Kaaby lea ovttas Cretura vokalisttain Sárá Márjjáin ráhkadan ođđa symfoniijalaš-metal musihkkavideo sámegillii.
– Vuoi gáfat datte, lei nu miellagiddevaš. Konsearta lei diekkár «colosseum» sullasaš arenas. Mii čuojaheimmet gaskija, beasaimet oaidnit nástealmmi ja buot. Vuosttaš geardde mis leamašan nu stuorra lávddis konsearta. 1500 olbmo ledje guldaleamen, ja Cradle of Filth vel lei «headliner» seamma beaivve. Oalle stuoris nu go gulat, muitala Sárá Márjá Guttorm.
Sárá Márjá dovdui váiban jearahallamis, son lei aiddo boahtán Bucharestas Romanias gos lei čuojahan «Metalhead Meeting» festiválas, muhto dan ovdal almmuhii son Rohttu lávlaga ovttas Treven Kaabyan.
Produseanta, miksár ja master dan ođđa musihkkavideoi, Rohttu, lea Treven Kaaby ja teavstta lea vokalista Sárá Márjá čállán.
Geahča video ja gula lávlaga avvir. no siiddus.
Ráhkadii lávlaga ovdalgo deaivvadeigga
Treven muitala ahte son ráhkadii lávlaga diimmá čavčča, ovdalgo oba deaivvai ge Sárá Márjjá. Dalle maid álggii jurddašit gean háliidii vokalistan ja gii son heivešii buoremus lávlagii.
Diibmá go son lei Árdna-tv jietnateknihkkár deaivvai son Sárá Márjjá ja su musihkkajoavkku Cretura.
– Mun ledjen guldalan sin musihka oalle ollu ja mearridin jearrat Sárá Márjjás háliida go son leamen mielde ráhkadit lávlaga. Sárá mieđai oalle johtilit maŋŋil go jerren sus ja vokála jienat báddejuvvojedje ovdal juovllaid, čilge Kaaby.
Dimmu Borgir joavku, boares Nightwish, ja dievva eará symfoniija metal joavkkut ledje inspirašuvdnan go Kaaby ráhkadii musihka. Instrumeanttat maid geavahii leat fioliinnat, cellot, trumpehtat ja eará sullasaš instrumeanttat.
Háliideaba olahit olbmuide
Soai Sárá Márjjáin filbmiiga video dušše moadde vahku ovdal almmuheami.
– Ráhkadeimme video danin go dalle lea stuorát vejolašvuohta olahit olbmuide. Olbmot han leat visuálalaš sivdnádusat, čilge Treven. Treven ja Sárá Márjá eaba deaivvadan ovttasbarggadettiin, muhto liikká manai dat bures Trevena mielas:
– Manai hui bures bargat ovttas Sáráin. Mun čuojahin musihka ruovttus mu studios, ja son čuojahii musihka sisa Walesas gos dalle váccii skuvlla. Mun adden sutnje kreatiivvalaš friijavuođa dahkat ja čállit dan birra maid ieš háliidii, juoidá maid dagan buohkaiguin geaiguin ovttasbarggan, muitala Treven.
Teavsttain vuosttalda «Alla hearráid»
Sárá fas muitala ahte Treven lea hui olmmošlaš ja buorre skibir.
– Mu mielas lei sus buorre lávlla ja lei olu somát ja álkit bargat lávlagiin go ožžon dahkat teavsttain ja melodiijain nu mo ieš háliidii, muitala Sárá Márjá.
Son teavstta čáledettiin jurddašii revolušuvnna birra. Dá lea oanehis oassi teavsttas: «Lihka, mánná, gula maid sii dadjet. Ále vuordde šat siste áibbas okto. Vázzil olggos, huikke»
– Teavstta sisdoallu lea beassat luovus dain njuolggadusain maid dat alla hearrát dahje «hoavddat» leat mearridan, čilge Sárá Márjá oanehaččat.
Sárá muitala ahte lea hui duhtavaš bohtosiin, son dovdá ahte dat givrodat maid háliidii čájehit oidno bures lávlagis. Son ii láve dávjá lávlut sámegillii muhto doaivu ahte šaddá eanet sámegiella Cretura boahtte albumas.
– In nu dávjá gal. Mu joavkkus lea okta lávlla mas lea veháš sámegiella («Når Lyset Dør»), muhto mun doaivvun ahte gullo eanet sámegiella min boahtte albumis, loahpaha Sárá Márjá.