– Ollu guolit ja unnán bivdu
Norgga Luonddudutkaninstituhtta (NINA) seniordutki, Odd Terje Sandlund lea earet eará sáivadutki. Son ii leat Guovdageainnus dutkan, muhto lea bearráigeahččan olu jávrriid ja jogaid Norggas NINA prošeavttaid oktavuođas.
– Lea hui álki fuobmát jus čuovžžas leat máđut. Dan oaidná jus čuohpasta guoli birgui, de ihtet máđut jus leat. Dat máđut gohčoduvvojit hávgamáhtun ja bohtet hávggas, muitala Sandlund.
Hávgga parasihtta
Hávggas lea parasihtta čoliin. Dat parasihtta monne hávgga čoliide ja hávga baika daid moniid jávrái. Daid moniid borrá čuovža ja čuvžii šaddet de hávgamáđut.
– Mađi eambbo hávggat leat jávrris, dađi eambbo dat baika ja dađi eambbo čuovža borrá daid baikkaid ja dađi eanet čuovžžat ožžot hávgamáđuid, čilge Sandlund.
Álkes muhte lossa čoavddus
– Áidna čoavddus maid mas sáhttá leat ávki lea bivdit garrasit, sihke čuovžžaid ja hávggaid. Čuovža gierdá garrasit bivdojuvvot. Dat lea lossa bargu maid šaddá dávjá bargat, muhto das lea ávki daid jagiid go bivdá garrasit, muitala Sandlund.
– Boares čuovžžaid galggašii earenoamáš olu bivdit eret, go dain leat ollu máđut ja dat ožžot máđuid álkibut go nuorra guolit, Dasalassin livččii buoremus bivdit dalle go hávga gođđá, rávve Sandlund.
– Ii leat váralaš borrat!
Odd Terje Sandlund namuha vel ahte dat ii leat váralaš borrat čuovžža mas leat hávgamáđut:
– Ii leat váralaš borrat, muhto ii soaitte leat nu miella borrat daid.