Luoddabarggut leat álgán Finnmárkkus
Asfalteremat leat álgán riikka- ja fylkkageainnuin Álttás, ja boahtte vahku ges Hámmárfeasttas.
Eanaš barggut leat ihkku, vai ii leat hehttehussan johtolahkii ja maiddái luoddabargiid sihkkarvuođa dihte.
– Mii šállošit go šaddá ollu riedja go bargat ijaid, muhto dat lea dárbbašlaš go bargu ferte dahkkot. Muhtin beivviid maŋŋel sáhttet olbmot illudit go luottat leat divvojuvvon, muitala Stáda geaidnodoaimmahaga huksenjođiheaddji Karoline Holmgren geas lea ovddasvástádus asfalteret luottaid Oarje-finnmárkkus. Oktiibuot galgá geavahuvvot 64 miljovnna ruvnno luoddadivodemiide dán geasi.
Oarje-finnmárkku luoddabarggut
Vuosttaš barggut álge mannan vahkku, go álge faskut eret boares asfáltta Álttás. Oktiibuot šaddá guokte kilomehtera ođđa asfálta Álttás. Boahtte vahkku álget ges barggut Hámmárfeasttas. Hámmárfeastta oažžu maid guokte kilomehtera ođđa asfáltta.
Váldet bottu gasku geasi
Honnesvágis galget maid asfalteret ovdal váldoluopmu álgá gaskamutto suoidnemánu. Borgemánus jotket barggut Porsáŋggus, Kárášjogas ja Guovdageainnus.
Lea Veidekke Industri fitnodat gii bidjá ođđa asfáltta Oarje-finnmárkkus, dieđiha Stáda Geaidnodoaimmahat neahttasiiddusteaset.